Таразда тарихи кешен тұрғызамыз деп 700 млн теңгеге жуық қаржы жұмсалған жоба бір жылдан бері бітпей тұр. «Тектұрмас» этно-мәдени кешенінде салынып жатқан «Ежелгі бекініс» құрылысы былтыр тамызда аяқталуы тиіс еді.
Мерзімінен кешіккен мердігер қаржы жетпей қалды дейді. Оның үстіне келісімшартта көрсетілмеген жұмыстарды атқарғандарын айтады. Мәселен қамал аумағының топырағы сусымалы болғандықтан тас қалау мүмкін болмаған. Сондықтан өз қаржыларына бетон төсеген. Әкімдіктен қосымша қаржы сұрағанмен ақша бөлуге асықпады деп отыр.
Есенғали Қайырбаев, құрылыс компаниясының өкілі:
Табиғи мына жаңбыр жаууы және тағы басқа нәрселермен кешігіп келе жатырмыз. Қалғаны өзінің кестесімен, жүйе бойынша орындалуда. Бір жағынан құрылыс материалдары қымбаттауынан кешігіп жатыр. Әкімдіктен ақша сұрадық. Өзімізден қанша ақша шықққанын мен айта алмаймын.
Әкімдік мердігерді мерзімінен кешіккені үшін сотқа берген. Тараптардың тартысы 4 айға созылып, құрылыс 15 айға кешіккен. Айта кетейік, Тараздың көне мәдениетінен сыр шерттетін «Ежелгі бекіністе арнайы амфитеатр мен мұражайлар ашылуы тиіс.
Нұрсұлтан Исабеков, Тараз қаласы әкімінің орынбасары:
2020-жылы сараптама қорытындысы өткен. Ол кезде 675 млн теңгені құрады. Сол бөлінген құны негізінде құрылыс жұмыстарын аяқтауға тиіс болатын. Сот шешімі негізінде осы жылдың соңына дейін аяқтап беруге міндеттелген. Нысанның қазіргі таңда 90% жұмыстары атқарылып, 16-шы желтоқсанға ашылу жоспарлануда.