Климаттың өзгеруі, жаһандық температураның көтерілуі, мұздықтардың еруі мұхиттардағы судың деңгейін көтеріп жатыр. Климатологтардың болжамы бойынша, алдағы онжылдықта кейбір қалалар жер бетінен жойылып кетуі мүмкін.
Climate Central баяндамасына сәйкес, 2030 жылға қарай әлемдегі кем дегенде 8 әйгілі қала су астында қалады. Олар тіпті планетаның қай аймақтары су астында болатынын бағалау үшін арнайы карта жасады. Бұл карта Біріккен Ұлттар Ұйымының Климаттың өзгеруі жөніндегі үкіметаралық тобының (IPCC) ақпаратын пайдалана отырып жасалған.
Міне, 2030 жылға қарай жартылай немесе толық су астында қалуы мүмкін 8 қала.
Амстердам (Нидерланд)
Нидерландтағы халықаралық танымал қала Амстердам өзінің көпірлерімен, әдемі табиғатымен танымал. Бұл қаладан басқа Роттердам және Гаага сияқты басқа қалаларға да қауіп төніп тұр. Нидерланд тұрғындары су тасқынына қарсы барлық қажетті құралға ие болғанымен Амстердам осы онжылдықта теңіз деңгейінің көтерілуінен зардап шегетіндердің бірі болуы мүмкін.
Басра (Ирак)
Басра – Парсы шығанағына құятын Шатт әл-Араб өзенінің бойында орналасқан Ирактың негізгі порты. Бұл қала осы онжылдықтың соңына дейін ішінара немесе толығымен су астында қалуы мүмкін.
Жаңа Орлеан (АҚШ)
Жаңа Орлеанда қазірдің өзінде оны су тасқынынан қорғайтын бөгеттер жүйесі бар. Бірақ қала келесі онжылдықты көру үшін қосымша қорғаныс шараларын қабылдауы керек.
Венеция (Италия)
Қаланың басым бөлігін су басады деген болжау бар. Қала жыл сайын екі миллиметрге шөгеді, сонымен қатар су деңгейінің көтерілуінің тікелей әсеріне тап болады. Венецияда су тасқынының алдын алу үшін қорғаныс шаралары бар болғанымен апаттың алдын алу үшін күрделі шешімдер қажет.
Хошимин (Вьетнам)
Хошиминнің көптеген аудандары онжылдықтың соңына қарай су астында қалуы мүмкін. Қаланы толығымен су басып кетпесе де, су тасқыны мен боранның салдарынан өмір сүру тым қауіпті болады.
Калькутта (Индия)
Үндістандағы Батыс Бенгалияның астанасы Калькутта 2030 жылға қарай қатты су тасқынына тап болып, қала суға батады дейді мамандар.
Бангкок (Таиланд)
Таиланд астанасы теңіз деңгейінен небәрі 1,5 метр биікте және жылына шамамен 2-3 сантиметр су астына шөгіп жатыр. 2030 жылға қарай қаланың жағалау аймақтарының көбі су астында қалуы мүмкін.
Джорджтаун (Гайана)
Оңтүстік Американың Гайана елінің астанасы Джорджтаун дауылдан қорғану үшін ұзындығы 450 шақырым болатын бір алып теңіз қабырғасына сүйенеді. Себебі жағалау сызығының көп бөлігі теңіз деңгейінен 0,5-1 метр төмен орналасқан. Гайана халқының 90%-ке жуығы жағалауда тұрады және ел су тасқынын болдырмау үшін теңіз қабырғасын айтарлықтай нығайтуы керек.
Еске сала кетейік, әлемде климаттың өзгеруіне байланысты алғаш аштықты сезінген ел бар.
БҰҰ-ның жергілікті өкілі Мадагаскар халқы аман қалу үшін қандай да бір жолмен ақша табудың барлық мүмкіндігін сарп еткенін айтты. Мадагаскардың оңтүстігінде аштық індеті тіркелді. Бұл – жаһандық климаттың өзгеруіне байланысты әлемдегі бірінші және мүмкін жалғыз зардап шеккен жер. Бұл туралы БҰҰ-ның баспасөз қызметі хабарлаған. Өйткені Мадагаскар кейінгі 40 жылдағы ең қатты қуаңшылыққа ұшырады.