Астанада «Су кодексі: су тасқынына дейін және одан кейін» атты ғылыми әдістемелік конференция өтті
«Байтақ» жасылдар партиясының бастамасымен еліміздегі су, экология саласының ғалымдарының қатысуымен су тасқыны және оның алдын алу шараларын талқылауға арналған ғылыми-сараптамалық кеңес өтті.
Кеңес жұмысына Қазақ-Британ техникалық университетінің инженерлік геоматика кафедрасының профессоры, PhD доктор жанай сағин, су үнемдеу саласы бойынша халықаралық дәрежедегі сарапшы, профессор Клим Шавкатович Аширяев, Ғылыми-техникалық және экономикалық зерттеулер институтының бас ғылыми қызметкері Асқар Абашұлы Абиров қатысты.
Сарапшылар мен «Байтақ» партиясының мүшелері су тасқынына және оның салдарына байланысты мәселелерді неғұрлым тиімді реттеу мақсатында Қазақстан Республикасының Су кодексін жетілдіру қажеттілігін талқылап өздерінің ұсыныстарын жеткізді.
Су тасқыны жыл сайын ел экономикасына айтарлықтай зиян келтіріп, азаматтардың өмірі мен денсаулығына қауіп төндіруде. Қолданыстағы Су кодексі климаттың өзгеруіне және басқа да факторларға байланысты қазіргі кезде туындаған сын-қатерлерді толық жауап бере алмайды.
Қазіргі таңда елімізде орын алған жағдайдың су және экология саласында толыққанды реформа керек екенін толық дәлелдеп отыр. Бұл салада біріншіден, су тасқынынан елді-мекендерді қорғау, ағын суды ауылшаруашылық саласына тиімді пайдалану, су инженерлік саласының мамандарын дайындау, болжау және талдау саласына қажетті құрылғыларды сатып алу сынды уақыт күттірмейтін мәселелер ортаға салынды.
Талқыланған мәселелер бойынша қазіргі таңда Мәжілісте қаралып жатқан «Су кодексіне» сарапшылар мен «Байтақ» жасылдар партиясы нақты ұсыныстарын жеткізуді көздеуде. Партия төрағасы Азаматхан Әміртаев партияның басты мақсаты экология мен қоршаған орнаты қорғау, Президенттің су мәселесіндегі саясатын қолдай отырып, экология және табиғи ресурстарды қорғау, су және ирригация министрліктерімен бірлесе отырып нақты жұмыс жасауға дайын екенін жеткізді.
Аталған министрліктер осындай қоғамдық ұйымдар мен сарапшылардың пікірін есепке ала отырып, болашақта еліміздің су тасқыны, суды үнемдеу сынды, суармалы егін, мал шаруашылығы саласындағы су проблемасын түбегейлі шешетін құнды ұсыныстары негізінде сапалы «Су кодексін» әзірлеуге болатыны хақ.
Ғылыми-сараптамалық кеңестің келесі көшпелі отырысы Қарағанды облысында жалғасады деп күтілуде.