KAZINFORM – 2023 жылы TikTok әлеуметтік желісінің әкімшілігі қазақстандық қолданушылардың 4,2 миллионнан астам видеосын жойып жіберген. Компания басшылығы бұған қоғамдастық ережелерінің бұзылуы себеп болғанын алға тартып отыр.
Платформадан жойылған бейнелердің шамамен 90 пайызы 50 елдің тұрғындарына тиесілі. Қазақстан бұл антирейтингке тұрақты түрде енетінін атап өткен жөн.
2023 жылдың бірінші тоқсанында әлеуметтік желі әкімшілігі қазақстандық қолданушылардың 766,7 мың видеосын жойды. Оның 88,8 пайызы жарияланғаннан кейін 24 сағат өтпей алынып тасталған.
Екінші тоқсанда TikTok тағы 950,2 мың бейнені жойды (88,2%-ы алғашқы 24 сағатта). Үшінші тоқсанда жойылған бейнелер саны төмендеген жоқ. Үш айда 1,1 миллион (алғашқы 24 сағатта 90,5%) видео алынған. Ал төртінші тоқсанда 1,4 миллионға жуық видео көзден ғайып болған (оның 86,3%-ы алғашқы 24 сағатта).
Компанияның айтуынша, 40 000 қауіпсіздік маманы қауымдастық ережелерінің сақталуын үнемі қадағалап отырады. Тек 2023 жылдың төртінші тоқсанында TikTok әкімшілігі бүкіл әлем бойынша 176,5 миллионға жуық пайдаланушының бейнелерін жойған. Сегіз миллион тікелей эфирді тоқтатқан. Сонымен қатар, 181 миллион фейк аккаунтты, 13 жасқа толмаған пайдаланушылардың 19,8 миллион аккаунтын және басқа себептермен 3,9 миллион аккаунтты бұғаттаған.