Редакциямызға Қарағанды облысының Осакаровка ауданында Зұлпықарқызы Дәкөш деген әжеміз хабарласты. Осыдан отыз жыл бұрын отанына Монғолиядан оралған әжеміздің баспанасы құлауға шақ тұрғанына 2 жылдың жүзі болыпты. Қазіргі күні үй құлап кетеме деп қорыққан әжеміздің үйі аңырап тұр. Ортадағы пеш жарылып, темір пеш қойғанымен жылытпайды дейді. 1960 жылдары салынған үйдің құлаудың алдында тұрғанын Осакаровка кентінің әкімі де, аудан басшылығы да біледі екен. Төбесі ойылып ортасына түскен қарт ананың қауқары неге жетсін. Қайырымды жандардан көмек болар деген үмітпен бірнеше рет әкімдікке де, аудандық газетке барыпты. Қолымызға аудандық газеттің «Қайырымды жандарға құлаққағыс» атты мақаланы көрсетті. Дәкөш апамыздың айтуынша, «Күнкөріс үшін бірнеше тауық сатып алып едім. Қорамның төбесі құлап, тауықтарымды басып қалды» деп жыламсырады. Осыдан бес-алты жыл бұрын астананың құрылысында істеп жүріп, құлап мертігіп қалған қызына берген бір бөлмеге анда-санда барам. Өйткені екі немереммен тұрғандықтан ол бөлмеге тұру мүмкіндігі жоқ дейді. Әйтеуір, ауылдың әкімі өткен жылы жеті қап цемент әкеп тастап кетіпті. Бір байқағанымыз Оскаровканың өзінде көптеген үйлер әлі орталық жылу жүйесіне қосылмаған. Көмір тасып үйін жылытады. Орталық көшелерін мұнтаздай ғып тазалап қойғанмен, шеткі көшелерінің жолдары жырым-жырым, шұрық, тесік екенін көзіміз көрген еді. Жиырма бірінші ғасырда қараусыз қалған қарт ананың баспанасын демеуші болса да тауып жөндеп бере алмаған әкімдік қызметкерлері «бұл жекменшік үй. Біз не істей аламыз?» деп иықтарың қиқаңдатудан әріге бармады. Бір күні ұйықтап жатып, үйінді астында қалып қойса кім жауап берер екен. Аталған мәселе бойынша біздің түсірілім тобы Осакаровка ауданына барып қайтқан еді. Бүгін «Baimedia» ютуб-арнасының «Әкімге айтам» бағдарламасына көріңіздер. Қарт анаға қол ұшын беруді редакция ұжымы атынан Қарағанды облысының әкімі Бөлекпаев мырзадан сұраймыз.
Baimedia.kz