Мәжілістің Экология мәселелері және табиғат пайдалану комитетінде парниктік газдар шығарындыларына квоталар саудасын дамыту перспективалары талқыланды. Жиынға комитет төрағасы Еділ Жаңбыршин жетекшілік етті.
Комитет төрағасы Қазақстан парниктік газдар шығарындыларын 1990 жылғы деңгейден 15 пайызға қысқартуға міндеттеме алғанын айтты. Бұл 2030 жылға қарай 327 миллион тонна СО2 болады. Мақсатқа жетудің негізгі құралдарының бірі – шығарындыларды саудалау жүйесі (ШСЖ).
Экология және табиғи ресурстар министрі Ерлан Нысанбаев ШСЖ аясында 2021 жылдан бастап қондырғыларға квоталар толығымен салыстыру әдісін қолдану негізінде жүзеге асырылатынын айтты. Бұл берілген квоталар бойынша қондырғылар арасындағы бәсекелестікке ықпал етеді және кәсіпорындарды шығарындыларды азайтуға ынталандырады.
Бұл ретте Еділ Жаңбыршин жыл сайынғы 1,5 пайыздық төмендеу көрсеткіші жеткіліксіз, сондықтан оны 5 пайызға дейін арттыру қажет екенін атап өтті.
– Парниктік газдар шығарындыларын азайту үшін біз 2026-2030 жылдарға арналған көміртегі квотасының Ұлттық жоспарында жылдық мөлшерлемені кемінде 2,73 пайыз қамтамасыз етуді көздеп отырмыз,
– деді Ерлан Нысанбаев.
Жиында Энергетика министрлігінің, бірқатар салалық қауымдастық пен басқа да ұйымдардың өкілдері өз ұстанымдарын білдірді. Депутаттар жауапты орган мүшелеріне тақырыпқа қатысты сұрақтарын қойды.
Жиын соңында Экология мәселелері және табиғат пайдалану комитетінің хатшысы Бауыржан Смағұлов жан-жақты талқылау болғанын, дегенмен әлі де қарастыру қажет мәселелер бар екенін айтты. Жұмысты жалғастыру үшін мүдделі мемлекеттік органдар мен салалық ұйымдардың қатысуымен жұмыс тобын құруды ұсынды