Шетелден машина әкеліп өз бағасының үстіне тағы сондай баға қосып мініп жүрген көп қазақтың бірімін.
5 300 000 (машина бағасы) +1 300 000 (кедендік баж + куәлік), 870 000 (утильалым) +1 700 000 (бірінші тіркеу).. Барлығы 9 млн: жолымен, анау мынау шығынымен, 5 млн машинасы 10 млн шығып тұр.
Бұндай құн төлеу басқа еш бір елде жоқ, көрші өзбектерде болуы мүмкін, бірақ олар өз нарығын өз машиналарымен қамтамасыз етеді, сондықтан осындай саясат жүргізіп отыр. Ал көрші Моңғолия, Қырғызстан сияқты елдерде бұл шаруа біздің теңгемен 500 000 тг көлемінде бітеді дейді. Тіпті өзі машина шығаратын жапонияңызда да шетелден кіретін машинаға бұндай қосымша төлемдер төлемейді. Енді айтыңызшы, осы жөн пе? Осындай халықтың қалтасына салмақ салып қарызға белшесінен батырған проблемалар тұрып біз қайдағы бір насыбайды талқылаймыз. Жақсы, насыбай зиян-ақ болсын, мәдениетсіздік, келісеміз, десе де насыбайды бәрі атып жүрген жоқ қой, ал жақсы көлікті бәрі міңгісі келеді. Бірлі жарым насыбай шегіп көшеге түкіріп-қақырғандардың әңгімесі ең жоғарғы мінбеде айтылуы қаншалықты орынды? Ақылыма сыймады.
Ол мінбеде осындай халықтың әлеуметтік-экономикалық жағдайына тура әсер ететін келелі істер мен ұлттың тілі, дәстүр-салт мәдениеті, осы елдің елдігін қалай сақтап қаламыз деген сияқты ұлы мәселелер талқылануы керек еді.
Елтаңбаға қатысты айтар ойым да осындай, қолданыстағы Елтаңба қазақтың жүрегіне киелі мөр ретінде бекіп орнығып үлгерген. Астарлы да, тұтас ұлттың өткенін баяндайтын құнды рухани нақыштарға толы. Біткен іске жабыспай бітпеген іспен жағалассақ нетті. Президенттің аузына осындай сөздерді салып, көптің наразылығын тудырып отырған жанындағылардың мақсаты не?. Шынымен халықтың жай-күй, жағдайынан хабарсыз, тәжірибесіз жандар ма? Сұрақ өте көп, шіркін, тұшымды жауап болса ғой осыған..
Айтқандай қырғыз бен қазақтың ұлттық киім күні құтты болсын! Қырғыздың ұлттық киімі біздікімен бірдей болмаса оны да көпшілік емес некен саяқ ақшасы ғана барлар киіп жүретін еді ғой (өзіміздікілердің бағасы удай), сапасыз болса да арзан қолжетімді ұлттық киіммен қанымдап отырған қырғыз бауырларға рақмет!
Нұрдәулет Шаймұратұлы