Киелі қазақ топырағының асты да, үсті де байлыққа толы. Сондықтан қай дәуірде де біздің жерімізге көз тіккендер көп болғанын аңғарамыз. Бір қынжылтатыны – ата-бабамыз ақ найзаның ұшымен, ақ білектің күшімен қорғап, аманат еткен игілігімізге көз сұғын қадаушылар әлі де азаяр емес. Шекарамыздан өтіп, байлығымызды бас салғысы келетіндердің бір парасы бүгінде даламызда кеурек қазып жүр. Олардың діттегені не? Бастарын қатерге тігердей кеуректің қандай құдіреті бар? Сасық кеуректің құм және шөлді (аридтік) аймақтарда өсетіндігін ескерсек, оны түп-тамырымен құрту жердің тозуына, құмның көшуіне алып келеді. Қазақстан бойынша дәрілік өсімдіктерді жинап, пайдалану мәселелері заңдық тұрғыдан реттелмегендіктен, ол «көлеңкелі экономикаға» тікелей жұмыс істеп тұр. Өйткені, жергілікті жерлерде бақылау жоқ. Міне, сондықтан да түрлі емдік және дәрілік өсімдіктер соңғы бірнеше жылда түп-тамырымен қопарылып, шетелдерге сатылып келеді және оның жабайы өсетін таралымы жойылып, табиғи экожүйелерге үлкен залал келтіруде. Бұл мәселе бойынша оңтүстік өңір тұрғындары экологи және табиғи ресурстар министрлігі мен «Байтақ» жасылдар партиясынан көмек сұрап хабарласуда. Аталған мәселе бойынша «Байтақ» жасылдар партиясы мәселені бақылауда ұстайтын болады.