Астана. 8 желтоқсан. BM.KZ — Жетісу облысы Алакөл ауданының прокуратурасы білім беру мекемелерінің жертөлесінен оқушылардың денсаулығына қауіп төндіретін сынапты лампаларды анықтады.
Жетісу облысы Алакөл ауданының прокуратурасы білім беру мекемелерінде қауіпті қалдықтарды пайдалану, сақтау және кәдеге жарату кезінде заңнама талаптарының сақталуына талдау жүргізді.
Талдау барысында бірқатар мектеп пен мемлекеттік балабақшада 436 дана істен шыққан сынапты лампа ұзақ уақыт бойы қоймалар мен жертөлелерде сақталғаны анықталды.
Бұл оқушылар мен қызметкерлердің денсаулығына тікелей қауіп төндіреді.
«Заңбұзушылықтар толығымен жойылды. Қауіпті қалдықтар белгіленген тәртіппен шығарылды. Осылайша 3 458 азаматтың, оның ішінде 2 947 оқушының және 511 қызметкердің құқықтары қорғалды», — делінген хабарламада.