Алматы облысы Қонаев қаласында 2023-2025 жылдарға арналған Алматы облысының экологиялық жағдайын жақсарту жөніндегі жол картасының іске асырылу барысын талқылау бойынша есептік кездесу өтті. Аталмыш щараға Қазақстанның BAYTAQ жасылдар партиясының төрағасы Азаматхан Әміртаев қатысты.
Алқалы жиында Алматы облысындағы жылу энергиясын өндіретін көмір кәсіпорындар мен көмір отынын пайдаланатын жеке тұрғын үйлердің залалды шығарындарын азайту, аймақты көгалдандыру, су ресурстарын реттеу және қалдықтарды басқару мәселелері қаралды.
Аталмыш проблемалардың алдын алу жолында қоршаған ортаға әсерді барынша азайта отырып, №3–ші жылу эклектр орталығын жаңғырту қажет. Ал көмірді пайдаланатын жеке тұрғын үйлердің залалдышығарындыларын азайту үшін Алматы қаласына жақын орналасқан аудандардың (Еңбекшіқазақ, Жамбыл, Қарасай, Талғар, Іле) қазандықтарын, тұрғын алаптарын, әлеуметтік, өндірістік және өзге де нысандарын газ отынына кезең–кезеңмен ауыстыру керек екендігі айтылды. Бұл бағытта аталмыш аудан әкімдіктері өздерінің жоспарымен бөлісті.
Облыс төңірегін көгалдандыру үшін жылына кемінде 50 000 бірлік жасыл желек отырғызу қажет дейді, Алматы облысы энергетика және тұрғын үй–коммуналдық шаруашылық басқармасының мамандары. Ал су ресурстарын реттеу бойынша Қонаев қаласындағы кәріз жүйесін, кәріз желілері мен тазарту құрылымдарын, құрылғыларын қайта жаңғырту және салу мәселесі кезек күттірмеуі керек. Сондай-ақ, «Сорбұлақ» көлінің теріс әсері мен экологиялық тәуекелін төмендету, тіпті болдырмау жолы да қарастырылғаны дүрыс. Сонымен қатар, Алматы облысы Еңбекшіқазақ ауданында орналасқан гидрогеологиялық өздігінен ағатын ұңғымаларды жою және консервациялау, Балқаш көлі мен Іле өзенінің биоалуантүрлілігін сақтау жөнінде жұмыс атқару маңызды болып тұр.
Қалдықтарды басқару мәселесі бойынша қолданыстағы заңнамаға сәйкес, міндетті таңбалануы бар елді мекендердің барлық контейнерлік алаңдарында «құрғақ» және «дымқыл» фракциялары бойынша қалдықтарды бөлек жинауға арналған контейнерлер орнату әлі дұрыс жолға қойылмақшы. Сонымен қатар, осы мәселе бойынша рұқсат етілмеген полигондарды анықтау және жабу, қалдықтарды сұрыптау кешендеріне әкету жөнінде мәселе қаралды.
Алдағы уақытта Алматы облысында тұрмыстық қатты қалдықтар полигондарын, өндіріс және тұтыну қалдықтарын уақытша сақтау орындарын ҚР қолданыстағы экологиялық және санитарлық талаптарына сәйкестендіру, сондай-ақ, тұрмыстық қатты қалдықтарды кәдеге жарату, сұрыптау және қайта өңдеу жұмыстарына шағын және орта бизнес субъектілерін тарту проблемалары да қолға алынбақ.
Самат САПАРАЛЫ