«Байтақ» жасылдар партиясының төрағасы Азаматхан Әміртаев Қазақстанда атом электр станциясының (АЭС) салынуына қатысты өз пікірін білдірді деп хабарлайды Баймедиа.кз.
Айта кетейік, Қазақстанның «Байтақ» жасылдар партиясы АЭС құрылысына байланысты қауіпсіздік, экологиялық тазалық, ашықтық, кәсібилік және басқа да факторларды түсіндіру бағытында үздіксіз ақпараттандырып келеді. Бұл туралы қазақстандық сайттар жарыса жазуда. Азаматхан Әміртаевтың айтуынша, атом электр станциясына қатысты түрлі пікір бар және жасылдар партиясы осы мәселе бойынша өз ұстанымын білдіргісі келеді.
«Елімізде атом электр станциясын салу жөнінде талқылау жүріп жатыр. Әрине, осы бағытта әртүрлі ой-пікір бар. «Байтақ» жасылдар партиясының басты мақсаты – таза ауа, таза жер, таза суды қамтамасыз ету, экологиялық таза өндірісті қалыптастыру болғандықтан осы бағытта жұмыс атқарып келеміз. Сондықтан атом электр станциясын салу мәселесінде ойымызды ашық, көзқарасымызды шынайы жеткізуіміз керек. Әлемде таза, жасыл энергия көзі – атом энергиясы боп саналатыны анық. Жалпы бізге АЭС керек пе деген сұрақтың өзі қате» дейді ол.
Сонымен қатар ол 2023 жылы Дубайда өткен ірі климаттық саммитте Қазақстанның қатысқанын атап өтті. Дамыған елдер, соның ішінде Еуропа, АҚШ, Оңтүстік Корея, Жапония және басқа да экономикалық қуатты мемлекеттер ХХІ ғасырда атом энергиясы негізгі энергия көзі болып табылатынын бір ауыздан мәлімдегенін айтты. «Өткен жылы Дубай қаласында климатқа байланысты «КОП-28» атты үлкен саммит өтті. Саммитке біз де қатыстық. Еуропаның дамыған елдері, АҚШ, Оңтүстік Корея, Жапония сынды мемлекеттер барлығы бір дауыспен атом электр энергиясы бүгінгі күннің басты энергиясы екенін атап өтті. Себебі атом электр станциясы ғана климаттың тұрақтылығын сақтау, қоршаған ортаны қорғау мүмкіндігіне ие» дейді партия басшысы.
Таза, қауіпсіз энергияны қолдайтын басшы көмір электр станцияларының атмосфераға тигізетін зиянына да назар аударды.
«Көмір отыны энергиясының ауаға жіберетін қалдығы көп. Мысалы, Теміртау, Балқаш, Алматы, Астана сияқты қалаларда демалатын ауа жоқ. Біз атом электр станциясының энергиясын таза, жасыл энергия көзі деп санаймыз. Халыққа осыны жеткізгіміз келеді. Ел осыны түсінсе дейміз. Атом электр станциясы – ғылымның жетістігі. Бұл жетістікті, осы бағыттағы барлық ғылыми ресурстарды дамытуымыз керек. Мәселен, әлемдегі ең үлкен уран шығаратын мемлекетпіз деп мақтанамыз. Бірақ оны біз шикізат ретінде ғана сатудамыз. Ал оны өңдеп, одан энергия алып, жақын елдерге экспортқа шығарсақ, мемлекеттік бюджетке қаншама пайда әкеледі. Оңтүстік Корея, Жапония, АҚШ, тіпті, Еуропа елдері өздеріне жеке атом электр станциясын салып жатыр. Бір ғана АҚШ-та 99 электр станциясы бар. Жапонияда атом, Оңтүстік Кореяда мини атом электр станцияларын қалаларға ғана емес, көше-көшені түгендеп салуда. Бұл аталған станцияның қауіпсіз екенін дәлелдейді. Ғылымда қателікпен жұмыс жасау деген қағида бар. Иә, ХХ ғасырларда ғылымға қарамастан туындаған белгілі бір апаттар бар болғанмен, оның барлығы ғалымдар тарапынан талқыланып, кемшіліктер жойылған. Атом электр станциясы «су-су» технологиясын пайдаланады. Ал әлемдік тәжірибеде аталған технологиясымен жасалған реактордың бірде бірінде апат болмаған. Сонымен қатар атом электр станциясымен уранды 4-5 % ғана байытуға болады. Демек ешқандай жарылыс қаупі жоқ. Бұл ақпаратты, шындықты қазақстандықтарға жеткізу – партиямыздың борышы» дейді.
Айта кетейік, күзде АЭС құрылысына қатысты референдум өтпек. «Біздің халқымыз осы референдумда дұрыс таңдау жасайды деп үміттенемін. Бұл бағытта біз әрбір сөзімізді, әрбір ғылыми дәлелімізді халыққа жеткізуге дайынбыз. Құрметті отандастар, дұрыс таңдау жасаңыздар. Біз ХХІ ғасырда өмір сүріп жатырмыз. Біз ғылымның жетістіктерін еліміздің игілігіне пайдалануымыз керек», – деп қорытындылады Азаматхан Әміртаев.