Қарағандыны газдандыру 2030 жылы аяқталуы мүмкін
Қарағандыны газдандыру шаралары 2019 жылы басталған болатын. Қаланы көгілдір отынмен қамту жобасы төрт кезеңді құрайды. Барлығы 16 іске қосу кешенін салу жоспарланған. Орталықтандырылған газдандыруды мемлекет тарапынан қаржыландыру уақытылы болса, жоба 2030 жылы толығымен іске асырылуы мүмкін.
Қазіргі уақытта қала бойынша Михайловка, Федоровка, Жаңа қала ықшам аудандарының 7018 тұрғын үйінің табиғи газға қосылуға мүмкіндігі бар. Табиғи газ осы үйлердің дәл іргесінен өтіп тұр. Бүгінгі таңда қала бойынша 2319 абонент табиғи газға қосылған. Бұл газдандырудың 33 пайызын құрайды. Барлығы 243 шақырым газ құбыры қолданысқа енгізілген.
Биылғы жылы төртінші, бесінші және алтыншы іске қосу кешендері жұмыс істей бастамақ. Бұл кешендер Үлкен Михайловка, Таугүл, Мелькомбинат шағын аудандарын, Күнгей елдімекенін және Global City аймағындағы үйлерді газбен қамтитын болады.