Солтүстік Қазақстан облысы Қызылжар ауданындағы Подгорое ауылында 1 жылда 6 үй өртенді.
Негізгі себеп – электр сымдарының қысқа тұйықталуы және түтін мұржасы қауіпсіздік талаптарына сай салынбаған дейді тұрғындар. Баспаналардың барлығы «Еңбек» мемлекеттік көші-қон бағдарламасы бойынша тұрғызылған. Жұрт барлық үйлерді тексеріп, олқылықтарды жоюды және айыптыларды жазалауды талап етіп отыр.
Елдімекенде 2019-2022 жылдар аралығында 39 баспана салынған. Тұрғындар 10 үйдің едені опырылып түсіп, құрылысты жүргізген мердігер компания қайта жөндегенін айтады. Алайда көпшіліктің пеш пен электр жүйесін тексеру қажет деген өтінішіне ешкім құлақ аспаған. Жаңа баспаналарды «Зерттеу СК» компаниясы салған. Ал жергілікті әкімдік оны байқау жариялау арқылы сатып алды. Әрқайсысына 7,5 млн теңгеге дейін қаражат бөлінген еді. Үйлердің кепілдік мерзімі – 5 жыл.
Асхат Бәкеев, Қызылжар ауданы әкімінің орынбасары:
39 үйдің зерттеуін жасайды. Бізге сметасын береді. Бізге аудан бюджетінен сол специфика бойынша ақша бөлінетін болады.