Олжас Бектенов Қостанай облысына жұмыс сапары кезінде өңірдің өнеркәсіптік әлеуетімен танысты. Нақтырақ айтсақ, Президенттің Жолдауда айтылған жоғары қайта өңдеуді игеру және локализация деңгейін арттыру жөніндегі тапсырмаларының орындалу барысын тексерді. Үкімет басшысы алдымен жылдық қуаттылығы 450 мың тонна болатын сұрыпты илем өндіретін кәсіпорынды аралалады. Өндіріс ошағының басшылары алдағы уақыттта болат дайындамасын шығаратын зауыт ашуды жоспарлап отыр. Оның қуаты 1 млн тоннадан аспақ. 600 жаңа жұмыс орны пайда болады. Премьер-министр жобаның маңыздылығына тоқталып, ірі өндіріс төңірегінде шағын және орта бизнес белдеуін қалыптастыру қажеттігін айтты. Олжас Бектенов сондай-ақ KIA автокөлігін өндіретін зауыт салынып жатқан индустриялық аймаққа да барды. Айта кету керек, жобаның жалпы құны 200 млн АҚШ доллар болса, оның 80 пайызы шетелден тартылған инвестиция.
Ерлан Төлетаев, KIA Kazakhstan бизнесін қолдау және дамыту департаментінің директоры:
Зауыттың құрылыс былтыр қараша айында басталды. Зауыт аумағы 63 гектарға жуықтайды. Өндіріс ошағынан жылына 70 мыңға жуық автокөлік шығарамыз деген жоспар бар. Өндіріс процессі жоғары технологиялық талаптарға сай болады. Нақтырақ айтсақ, өндіріске 65 робот жұмылдырылады. Алғашқы өнім 2025 жылдың қазан айында шығады.
Сонымен қатар Үкімет басшысы еліміздегі автомобиль шығаратын жетекші кәсіпорындардың бірі «СарыарқаАвтоПром» компаниясының өндірістік қуатын байқады. Зауыттың басшылығы биыл шығарылатын өнім көлемін 90 мың автомобильге жеткізуді көздейді. Өндіріс желісінде JAC, Kia, Chevrolet, Jetour, Skoda сияқты брендтер бар. Жалпы биылғы 11 айда Қостанай облысында өнеркәсіп өнімін өндіру көлемі 2,5 трлн теңгеге жетіп, өңдеу өнеркәсібінің үлесі 72%-дан асқан. Айта кету керек, Қостанай облысы машина жасау саласы бойынша елімізде көш бастап тұр.
Виталий Христ, Allur автомобиль зауытының операциялық директоры:
Allur Қазақстандағы ең ірі автомобиль өндіретін зауыт. Кәсіпорында 3200-ден астам адам жұмыс істейді. Мұнда автомобильдер бастан аяқ құрастырылады. Биыл пластик бояйтын жаңа цехты іске қостық. Онда жылына 62 мың пластик жиынтығын бояуға болады. Одан бөлек қазір мамандар даярлап жатырмыз.