«Айка тізімі» есіңізде ме? Бір уақытта шу болып, тез-ақ басылып қалған бұл оқиғаның арты не болды?
Қазақстандық баспасөз Айка тізімі туралы ақпаратты былтырғы желтоқсанда дүркіретіп хабарлаған. Онда атақты тұлғалар да жүргені белгілі болған. Бұл тізім шу туғызғаны сонша, тіпті интернетте тізімдегілердің бірі әзілге айналдырды, кейбірі ақталып жатты. Артынша шенеуніктер де пікір білдіре бастады.
Мәселен ішкі істер министрі Ержан Сәденов дербес дерек таратқандар 7 жылға дейін сотталады деген. Қызметтік тексеріс басталған. Алайда 3 айдың жүзі өтсе де, «Айка тізімінен» хабар жоқ. Жұрт та ұмытты, шенеуніктер де еске алғысы келмейді. Ал мұның басында полиция тек байларға арналған қызмет түрін ұсынды деген бір келіншекті ұстаған. Оның жыл сайынғы табысы 209 млн теңге делінген. Жасы 25-те. Бай қазақстандықтарға 10 мың долларға қызмет ұсынатын қыздардың тізімі дәл осы Айка Love деген келіншектен табылған-мыс.
Ол өз клубына кіретін эскорт қызметін көрсететін қыздардан 300 доллар алып отырған. Алайда белсенді болмағандарды апта сайын чаттан өшіріп отырған. Жеңгетайлық қызметі үшін әрбір эскортшы қыз оған табысының 40 пайызын беруге міндетті болған. Бұл клубтағы қыздардың бір сағаттық кездесуі 500 доллардан басталған. Ал ұзақ уақытқа «табысу» 10 мың долларға жеткен.