Астана. 22 қыркүйек. BM.KZ – Amazon Қазақстанды тек ұлттық жобаларды жүзеге асыратын басты алаң ғана емес, сонымен қатар аймақтық спутниктік байланыс орталығын құру платформасы ретінде қарастырып отыр, деп хабарлайды Ақорда баспасөз қызметі.
Мемлекет басшысы Қасым-Жомарт Тоқаев пен Amazon компаниясының Жоғарғы вице-президенті, халықаралық және құқықтық мәселелер жөніндегі бас директоры Дэвид Запольски цифрландыру, байланыс және жасанды интеллект саласындағы іргелі бастамаларды талқылады.
Президент Amazon компаниясы мен ҚР Жасанды интеллект және цифрлық даму министрлігі, сондай-ақ «Қазақтелеком» компаниясының бірлескен жобаларын қолдады.
Ынтымақтастық еліміз бойынша жоғары жылдамдықты кең жолақты интернетке қолжетімділікті қамтамасыз ету және киберқауіпсіздікті нығайту секілді стратегиялық маңызды салаларды қамтиды.
Қазақстан Президентінің Нью-Йорктегі жұмыс сапары барысында келісімге қол қойылды. Келісімге сәйкес, Amazon Kuiper Алматы, Ақкөл және Ақтау қалаларында өздерінің жер инфрақұрылымын орнатуды жоспарлап, шамамен 200 млн доллар инвестиция салмақ.
Жобаны жүзеге асыру мемлекет басшысының цифрлық инфрақұрылымды дамыту және барлық аймақтарда заманауи телекоммуникациялық қызметтерге тең қолжетімділікті қамтамасыз ету туралы тапсырмасын орындау аясында жүргізіледі.
«Рахмет, Президент мырза! Сізбен кездесу біз үшін үлкен құрмет. Біздің команда осында болғанына өте қуанышты. Цифрлық технологияларды енгізу бастамасы – Орталық Азиядағы алғашқы ірі жобамыз. Біз «Қазақтелеком» компаниясымен ынтымақтаса отырып, Қазақстан тұрғындарын жоғары жылдамдықты және қолжетімді интернетпен қамтамасыз етуге дайынбыз», – деді Amazon компаниясының Жоғарғы вице-президенті Дэвид Запольски.