Астана. 26 қыркүйек. BM.KZ – Қазақстан астанасында әйгілі суретші Пабло Пикассоның бірегей туындыларының көрмесі ашылды, деп хабарлайды Kazinform тілшісі.
Көрмені халықаралық Lumiere-Hall музейі ұйымдастырды. Экспозицияда Германия, Бельгия және Францияның жеке коллекцияларынан алынған шебердің 51 литографиясы қойылған.
Lumiere-Hall музейінің тең құрылтайшысы Максим Егарминнің айтуынша, бұл жұмысты музей бір жылға жуық күтіп, жалға алу арқылы елге жеткізген.
«Пикассо көзі тірісінде өте танымал болды, бәрі оның еңбектерін иеленгісі келді. Әрине, ол майлы бояумен бәрін үлгеріп жаза алмайтын. Сол себепті литография – арнайы станок арқылы жасалатын басылым, қазіргі тілмен айтқанда принт, ерекше маңызға ие. Өйткені ол шектеулі сериямен шығады, суретшінің қолтаңбасымен рәсімделеді, ал әлемде мұндайды жасайтын бірнеше компания ғана бар», – дейді ол.
Коллекцияның құндылығы – Пикассо шығармашылығының әртүрлі кезеңдерін қамтитынында. Онда классикалық мектептен бастап минимализм мен кубизмге дейінгі ізденістер көрініс тапқан.
Көрмеде «Барселонаның көгілдір түсі» атты күнделікті өмір көріністеріне арналған серия, сондай-ақ атақты «Герника» картинасын жасау барысын сипаттайтын материалдар ұсынылған. «Папье-колле» бөлімі суретшінің кубизмге көзқарасын ашады, ал жеке бөлім Пикассоның соғыстан кейінгі кезеңдегі коррида тақырыбына қызығушылығына арналған. Экспозиция «Соғыс және бейбітшілік» сериясымен түйінделеді.
Бұған дейін көрме Алматыда өткен. Егарминнің айтуынша, онда көрермендер арасында ең көп қызығушылық тудырғаны – Пикассо әйелдерінің портреттері болған.
Астанадағы көрмені 9 қарашаға дейін Kulanshi Art галереясында тамашалауға болады. Сонымен қатар музей суретшінің өмірі мен шығармашылығына арналған бірқатар дәріс өткізуді жоспарлап отыр.