Астана. 8 желтоқсан. BM.KZ — Желіде «Атырау облысында аңға шыққан ер адам абайсызда оққа ұшып көз жұмды» деген ақпарат тарады. Облыстық полиция департаменті оқиғаға қатысты түсінік берді, деп хабарлайды NUR.KZ.
«5-інен 6 желтоқсанға қараған түні Қызылқоға ауданында 36 жастағы адам абайсызда 39 жастағы серігін атып өлтірген. Оқиға түнгі сағат 02:30 шамасында Жасқайраттан 30 шақырым жердегі Аққора ауылының маңында болған. Алдын ала мәлімет бойынша, ер адамдар аңға шығып, алкогольдік ішімдік ішкен. Қаруды қолданудағы қателік адам өліміне себеп болған», — делінген Instagram желісінде.
Қызылқоға аудандық полиция бөлімі Аққора ауылы маңында болған адам өлтіру дерегі бойынша қылмыстық іс қозғады.
«Күдікті 36 жастағы адам қамауға алынып, уақытша ұстау изоляторына қамалды. Кешенді тергеп-тексеру шаралары жүргізілуде. Тергеу мақсатына байланысты басқа ақпарат жарияланбайды», — деп хабарлады ведомствоның баспасөз қызметі өкілі.