Былтыр қарашада Гаага конвенциясына Қытай қосылғаннан кейін Қазақстанға көшіп келген Қытай азаматтарының құжаттарын реттеу тәртібі өзгерген. Қазақстан азаматтық алғысы келген қандастардан апостиль талап етеді. Үкімет Гаага конвенциясына қосылған елдерге қойылатын талап пен тәртіп ортақ, оны орындау керек дейді. Апостиль қойдыру үшін қандастарға қайтадан Қытайға баруға тура келеді.
Қытайдан атамекенге көшіп келген қандастар Қазақстан азаматтығын алуға апостиль туралы талап бөгет болып отыр деп шағынады. Қытайға апостиль алуға барайын десе, ол жақ жібермей қоя ма деп жасқанады. Белсенділер болса қандастар мәселесін шешу Қазақстан билігінің өз қолында дейді.
Қытайдан келген қандастардың құқын қорғаумен айналысып жүрген белсенді Ауыт Мұқибек апостиль мәселесін шешуді сұрап министрлікке, тіпті президентке дейін хат жазыпты.
«Әуелі Қазақстан ішкі істер министрлігіне хат жаздым. Олар «бұл мәселені Сыртқы істер министрлігімен бірлесе отырып шешеміз» деп сырғытпа жауаппен шығарып салды. Одан кейін президент Қасым-Жомарт Тоқаевтың өзіне хат жаздым. Оның аппаратынан «президент бұл мәселеден хабардар» деген жауап келді. Осы жолғы Ұлттық құрылтайда қозғалар деп үміттенген едік. Бірақ билік аузына да алмады» деп қынжылыс білдірді Ауыт Мұқибек.