Шымкент. 4 тамыз. /Нұргүл Ерғалиқызы/ BM.KZ – Шымкенттегі Асқар тау көшесінің тұрғындары жол қауіпсіздігі мәселесіне байланысты наразылық танытып жолды жапты.
Жергілікті тұрғындардың айтуынша, көшеде көліктердің жоғары жылдамдықпен жүруі салдарынан бірнеше бала жол апатына ұшыраған. Бақытына орай, балалар аман қалғанымен, олар түрлі дене жарақатын алған.
Қала тұрғыны Дүрия Кәрібаеваның сөзінше, немересін көлік қағып кеткен, бірақ аман қалған.
«Бірақ денесінде сынбаған, көгермеген жері қалмады. Бұған дейін де бір баланы көлік қағып кеткен. Біз мұны жазым деп ойладық, бірақ қайталанды. Балаларды үйде қамап ұстай алмаймыз, ойнайтын жері жоқ. Сондықтан көршілермен бірігіп, ереуілге шықтық. Бұл мәселе шешілмесе, үлкен қайғыға ұласады», – дейді ол.
Наразылыққа шыққан тұрғындар жергілікті әкімдікке бірнеше рет шағымданғанымен, еш нәтиже болмағанын айтып, реніштерін білдірді. Олар көлік жылдамдығын шектеу, жол белгілері мен бейнекамералар орнату, сондай-ақ жүк көліктерінің жүруіне тыйым салуды сұрайды.
Оқиға орнына жеткен Шымкент қаласының жолаушылар көлігі және автомобиль жолдары басқармасының бас маманы Марлен Әлиев жол белгілерін әр көшеге қоя алмайтындарын, тек әлеуметтік нысандардың алдына орнатылатынын айтады. Ал Абай ауданы әкімдігі өкілі мәселені зерделеп, тиісті басқармамен бірлесіп шешім қабылдайтынын, алдағы уақытта тұрғындармен қайта кездесіп, түсіндірме беретінін мәлімдеді.