AZINFORM — Батыс Қазақстан облысында қарқынды еріген қар суы аудандық маңызы бар екі жолдан тасып ақты.
БҚО ТЖ департаментінің баспасөз қызметінен мәлім еткеніндей, оқиға 25 наурыз күні Ақжайық ауданы Құрайлысай ауылдық округі Әтібек қыстауы маңында Жұбан-Сайқұдық жолының 7-шақырымында болды.
Жолдың осы тұсында 1 мың мм-дан 3 су өткізгіш құбыр бар. 2023 жылы инженерлік жұмыстар жоспарына сәйкес тағы бір құбыр қосымша орнатылды. Су шайған учаске лента және жол белгілерімен қоршалған. Айналма жол бар.
«Сондай-ақ 25 наурыз күні Жәнібек ауданы Жақсыбай ауылдық округінде Жәнібек-Талов-Сарыөзен жолының 3 ойпатты учаскесін су шайып кетті. Мұнда да зардап шеккендер жоқ. Көлік қозғалысы бұзылған жоқ. Су шайған тұстар лента және жол белгілерімен қоршалып, жергілікті атқарушы органдардың, полиция департаменті және төтенше жағдайлар бөлімдерінің күштерімен кезекшілік ұйымдастырылды. Елді мекендерге қауіп жоқ», — деп хабарлады ведомстводан.
Еске сала кетейік, бұдан бұрын Батыс Қазақстанда қар қатты еріп, өзендерде су тасуы ықтимал екендігін жазған болатынбыз.
Сондай-ақ Орал қаласының көшелері суға тола бастады.