Соңғы жылдары Қазақстанда жүгіру спортымен айналысатындар мен марафоншылардың саны да, сапасы да артып келеді. Бұл салауатты өмір салтын ұстануда қазақстандықтардың санасы оянып, өз денсаулығына бейжай қарамау арқылы өзгелерге де үлгі болып жүргенінің айғағы. Статистикаға сүйенсек, 2022 жылы Алматы марафонына 20 000-нан астам адам қатысты. Дегенмен өзге қалалар да жүгіру марафондарын ұйымдастыру, белсенді қатысуда қалыс қалмайды. Үлкен өзгерістер кішкентай қадамнан бастау алатынын ескерсек, Астана қаласында «Байтақ» жасылдар партиясының ұйымдастыруымен тұрақты түрде өткізіліп жүрген «Baytaq Run Fest» жобасының маңызы мен мақсаты өзгеше.
28 шілдеде елордада «Байтақ» Қазақстанның жасылдар партиясы ұйымдастырған BAYTAQ RUN FEST эко жүгіру фестивалі өткен болатын. Шараның басты мақсаты – салауатты өмір салтын сақтауды насихаттай отырып, экологиялық мәселелерге қоғамның назарын аудару. 210 адам қатысқан жүгіру фестивалі «Астана» триатлон саябағынан бастау алды. Қатысушылар таңғы сағат 9:00-де жүгіруге шығып, 5 шақырым қашықтықты бағындырды. Айта кетейік, эко жүгіру жобасына аталған саябақтың таңдалуында да мән бар. Таза табиғатымен, тыныш атмосферасымен жүгірушілерге ерекше әсер береді деген мақсатпен осы локация таңдалып отыр. Әрі 5 шақырым – тәжірибелі жүгірушілерге де, жаңадан бастаушыларға да ыңғайлы қашықтық. Алты жасар баладан алпыс жасар қартқа дейін игі шараның басы-қасынан табылғаны көңіл қуантарлық жайт. Фестивальдің бас ұйымдастырушысы, марафоншы Әлішер Күзекбаевтың айтуынша, эко жүгіруге 15-71 жас аралығындағы астаналықтар қатысты.
«Тұрақты жүгіру жүрек-қан тамырлары жүйесінің жақсаруына, салмақты бақылауда ұстауға, бұлшықеттер мен сүйектердің нығаюына, иммундық жүйені жақсаруына әсер етеді. Сонымен қатар психологиялық пайдасы да аз емес. Мәселен, көңіл-күйді көтеруге, ұйқы сапасының жақсаруына, өзіне деген сенімділіктің артуына көмектеседі. Әрі тұрақты түрде жүгіру өмір сүру ұзақтығын арттыруға ықпал етеді. Жүгірушілердің өмір сүру ұзақтығы жүгірумен айналыспайтындарға қарағанда орташа есеппен 3 жылға ұзақ.
«Baytaq Run Fest» жобасына қатысушылар – экологияның шынайы жанашырлары деп есептеймін. Алдағы уақытта осы бағыттағы шаралар мен эко жүгірулер жоспарға сай жалғасын таба беретін болады» дейді ол.
Айта кетейік, жүгіруді аяқтаған әрбір қатысушы медаль мен партия төрағасы Азаматхан Әміртаевтың арнайы Алғыс хатына ие болды. Сонымен қатар жарыс соңында қатысушылардың старттық нөмірлері бойынша лотерея ойнатылып, қорытынды концерт өтті. Экологиялық қозғалысты қолдап, салауатты өмір салтын насихаттау жолындағы белсенділердің қатарын арттыруға сіз бен біз болып таудай мақсатқа тамшыдай болса да үлесімізді қоса берейік.
