Белгілі экономист өзінен ақша бопсалаған қайын атасын түрмеге жапты

Президенттің бұрынғы кеңесшісі Олжас Құдайбергеновтің әйелінің әкесі Төлепқали Қабылов 7 жылға бас бостандығынан айырылды. 2022 жылдың наурыз айында Ұлыбританияда Құдайбергеновтің әйелі полицияға күйеуі балаларын ұрлап кеткені туралы арыз берген. Келесі күні Олжас Құдайбергенов Лондон әуежайында ұсталып, абақтыға қамалған. Бірнеше күннен кейін қайын атасы оған хабарласып, қызының Ұлыбританияда немерелерімен екі жыл тұруы үшін қажет 30 мың фунт стерлинг талап еткен. Ақшаны беруге келіспеген жағдайда БАҚ беттерінде әйеліне тұрмыстық зорлық-зомбылық жасап, бала ұрлағаны туралы ақпарат тарататынын айтып қорқытқан. Экономист ақшаны үшке бөліп төлеуге келіскен. Алғашқы 5000 фунтты қайын атасына досы апарған. Келесі күні экономисттің әйелі арызын қайтарып алған. Құдайбергенов Қазақстанға келіп, екінші келісілген 10 мың фунт стерлингті беру кезінде күдікті Қабыловты полиция қызметкерлері тұтқындаған.