Франция астанасы Париж қаласында өтіп жатқан Олимпиада ойындарында бокстан Қазақстан ұлттық құрамасының бас бапкері Мырзағали Айтжанов Нұрбек Оралбайдың жекпе-жегінен кейін өз пікірін айтты, дейді казинформ.
«Бұл Олимпиадада біз күтпеген сенсациялар көп болды. Нұрбекті финалда көрдіңіздер, барын салып жұдырықтасты. Ең бастысы жеңіске ұмтылды. Бірақ, қарсыласы да оңай шағылатын жаңғақ емес қой. Мықты боксшы. Ол да, жеңісті бергісі келмеді. Осыған дейін қарап отырған болсаңыздар, өздеріңіз де көрдіңіздер, әлемнің бес дүркін, Олимпиаданың екі дүркін чемпиондары да жүлдеге іліге алмай қалды», — деді бап бапкер.
Сондай-ақ, Қазақстан құрамасының барлық боксшысы Олимпиада ойындарында барын салып жұдырықтасқанын ерекше атап өтті.
«Париж Олимпиадасында өкініштісі бізге алтын бұйырмады. Бірақ, мен жігіттерге ренжімеймін. Олар өз айқастарында барын салып жұдырықтасты. Алайда, төрешілер кімнің қолын көтерді, сол ары қарай жарысты жалғастырып отырды. Бұл Олимпиада бәрімізге сабақ болатыны анық. Осымен екінші Олимпиадада алтынсыз қалып отырмыз. Бірақ мен қазақ боксының жеңісті дәстүрге қайта оралып, аяққа нық тұрарына сенемін», — деді Мырзағали Айтжанов.
Естеріңізге сала кетейік, бүгін бокстан ерлер арасында 80 келі салмақта Нұрбек Оралбай Париж Олимпиадасының күміс жүлдегері атанды. Ол финалда украиналық Александр Хижнякпен жұдырықтасып, жеңіліп қалды.
Айта кетсек, Париж Олимпиадасына бас бапкер Мырзағали Айтжанов жеті боксшы алып келген болатын. Өкінішке қарай, оның алтауы жарысты ерте аяқтады.
Ал әйелдер боксынан лицензия жеңіп алған үш боксшының екеуі алғашқы жекпе-жекектерінде жарыс жолын аяқтаса, тек олардың арасынан 50 келі салмақта Назым Қызайбай ғана ел үмітін ақтады. Ол ел қоржынына Олимпиада ойындарының үшінші қола жүлдесін сыйлаған еді.