Шымкент. 23 шілде. BM.KZ – Алматыда ресми атауы жоқ 156 көшеге жаңа ат беру жоспарланып отыр.
Алматыдағы көшенің біріне аты аңызға айналған мәнерлеп сырғанаушы Денис Теннің есімі берілуі мүмкін. Қала әкімдігі бұл бастаманы көтеріп, тиісті ұсыныстарды мәслихаттың қарауына жіберді, деп хабарлайды «Крыша».
Жаңа атаулар қаланың жеті ауданындағы көшелерге беріледі. Ұсынылған атаулар қатарында мәдениетке, өнер мен тарихқа еңбегі сіңген танымал тұлғалардың есімдері де бар.
Атап айтқанда, Бостандық ауданындағы бір көшеге 2018 жылы қапыда қаза тапқан мәнерлеп сырғанаушы, Олимпиада жүлдегері Денис Теннің есімін беру көзделіп отыр.
Сонымен қатар көшелерге келесі тұлғалардың есімі берілуі мүмкін:
Хо Ши Мин — вьетнам революционері, саяси қайраткер;
Наталья Сац — әлемдегі алғашқы балалар музыкалық театрының негізін қалаушы;
Әбдуәлі Қайдаров — тілтанушы, түрколог, ғылым қайраткері.
Жалпы тізімде көркем әрі ұлттық сипаттағы атаулар да бар:
Мұнара
Сарқырама
Құлын
Абыз
Сұңқар
Құдірет
Ұсыныстар алдымен қала тұрғындарымен талқыланып, мәслихат депутаттарының қарауына ұсынылады. Қорытынды шешім қалалық сессияда қабылданады.
Денис Тен — Қазақстанның еңбек сіңірген спорт шебері, 2014 жылғы Олимпиада ойындарының қола жүлдегері. 2013 жылғы әлем чемпионатының күміс, 2015 жылғы әлем чемпионатының қола жүлдегері. Төрт құрлық чемпионатының жеңімпазы, Азия ойындарының чемпионы және Қазақстанның бес дүркін чемпионы.