Атырауда өтіп жатқан үшінші Ұлттық құрылтайдың секциялық жұмысына қатысқан «Байтақ» жасылдар» партиясының төрағасы Азаматхан Әміртаев қоғамды алаңдатқан экология мәселелерін көтерді.
Партия басшысы А.Әміртаев елімізде тау-кен, мұнай т.б салаларда жұмыс жасап жатқан компаниялардың мемлекетке төлеп жатқан эмиссиялық салықтарының аздығын сөз етті. Азаматхан Әміртаев өз сөзінде: «Мемлекет басшысы Қасым-Жомарт Тоқаев экология мәселесін сайлауалды бағдарламасының басым бағыттарының бірі ретінде белгіледі. Алайда, бұл мәселеге келгенде Үкіметте нақты зерттеу, зерделеу жұмыстары жүргізілмей отыр. Нақты айтар болсам, салық кодексінде қоршаған ортаны ластағаны үшін салынатын эмиссиялық салықтың 16 түрін көрсеткен. Шын мәнінде оның көрсеткіштері 600-ден асады. Салық кодексінде масса көбейтілген төлем мөлшері деген түсінік бар. Бір қызығы оны табиғи байлықтарымызды игеретін компаниялар массаға негізделген төлем мөлшерін төмендетіп көрсетіп, қанша қоқыс шығаратынын өздері белгілеп отыр. Сондықтан да ел бюджетіне төлеп жатқан салықтары 98 млрд тенгеден аспайды. Ал экологиялық эмиссия салығын қайта қараса, ел қоржынына триллиондаған қаржы түсері хақ», — деді.
Айта кету керек, 2022 жылы Қарағандыдағы зауыттар бюджетке 17 млрд тенге, ал Атырау облысындағы жылына 51 млн тонна мұнай өндіретін компаниялар небары 12 млрд тенге салық төлеген.
Жеріміздің асты мен үсті табиғи байлыққа толы. Экологияның нашарлауынан Арал теңізінен айырылып, гүлге оранған даламыз құмға толып, мыңдаған адамдардың қатерлі ауруларға душар болып жатқанын күнде жазып, айтып жатамыз. Билікте отырған мырзалар бүгінгінің пайдасымен емес, ертеңгі күннің амалымен өмір сүрсе құба-құп болары сөзсіз.
Ұлттық құрылтайдың секция отырысында Азаматхан Сайлауұлы Атырау облысындағы Құлсары қаласындағы мұнай компаниялары жылына 37 млн тонна мұнай өндіретін атап өтті. Экологтың сөзінше, қазіргі таңда қаланың ауасы бұзылып, жері шөлге айналып барады. Салдарынан 250 ден астам мүмкіндігі шектеулі бала тұрады. Бірақ, оларды емдеу, сауықтыру орталықтары жоқ, деді ол.
«Байтақ» жасылдар партиясы халықпен үнемі тығыз байланыста жұмыс жасап келеді. Келелі ұсыныстары мен жүйелі жұмыстарын көрсетіп, қоршаған ортаны ластанып жатқанын және оны шешу тетіктерін биліктің барлық тармақтарына жеткізіп келеді. Жер де, ел де – халықтың қазынасы. Құрылтайға шақырылыған елдің игі жақсылары сайын даламыздың саф ауасының сақталуына қолдау көрсетіп, болашақ ұрпақтың таза табиғатта өмір сүруіне атсалысады деген сенімдеміз.
Baimedia.kz