Астана. 5 тамыз. /Нұргүл Жолымбетова/ BM.KZ – Былтыр елімізде ана өлімінің деңгейі 12%-ға, ал нәресте өлімінің деңгейі 11%-ға төмендеген. Ал 2025 жылдың алғашқы 6 айының қорытындысы бойынша, бұл көрсеткіштер тиісінше 10% және 26%-ға азайған. Бұл туралы Денсаулық сақтау министрі Ақмарал Әлназарова бүгін Үкімет отырысында айтты.
Бұл жетістік Дүниежүзілік денсаулық сақтау ұйымы (ДДСҰ) мен ЮНИСЕФ ұсынымдарына негізделген жаңа тәсілдерді енгізу бойынша жүзеге асырылған. Атап айтқанда, елімізде акушерия саласы бойынша 25, педиатрия саласы бойынша 20 клиникалық хаттама жаңартылған.
«Босанғаннан кейінгі қан кетулердің алдын алу үшін жаңа әдістер енгізіліп, нәтижесінде ағзаларды сақтап қалу операциялары 20%-ға артты. Сонымен қатар, медициналық авиация желісі арқылы шұғыл және жоғары мамандандырылған көмек көрсетілді. Нәтижесінде, ауыр жағдайда болған әйелдер мен балалардың 96%-ының өмірін сақтап қалу мүмкін болды», – деп жазылған мәлімдемеде.
Сондай-ақ, министр босандыру және балаларға арналған медициналық ұйымдардың материалдық-техникалық базасы едәуір жақсарғанын жеткізді. Айтуынша, өткен жылдан бері бұл ұйымдардың медициналық техникамен жабдықталу деңгейі 87%-ға жетіп, құрылғылардың тозу көрсеткіші 37%-ға дейін төмендеген.