Астана. 11 тамыз. /Нұргүл Ерғалиқызы/ BM.KZ – Кеше елімізде Ұлттық бірыңғай тестілеу (ҰБТ) басталды. Бұл кезең 14 тамызға дейін жалғасады. Ұлттық тестілеу орталығының мәліметінше, тест тапсыру үшін барлығы 28 мыңға жуық өтініш қабылданған.
Тестілеудің алғашқы күні 2,2 мыңға жуық талапкер ҰБТ тапсырады. Қатысушылардың 65%-ға жуығы қазақ тілінде болса, 35%-ы орыс тілінде, ал 89 үміткер ағылшын тілінде тестілеуден өтеді.
«Тамыздағы ҰБТ-ға биылғы және былтырғы мектеп және колледж түлектері, қандастар (ҚР азаматы болып табылмайтын ұлты қазақ азаматтар), шетелде білім алған орта білім беру ұйымдарының бітірушілері, шығармашылық мамандықтардан басқа мамандықтарға, басқа мамандықтардан педагогикалық бағыттарға ауысқысы келетін студенттер және жоғары оқу орындарына шартты түрде қабылданған студенттер қатысады», – деп жазылған мәлімдемеде.
Сонымен қатар, колледжді тәмамдаған және ЖОО-да ақылы негізде өз мамандығы бойынша оқуды жалғастыруды жоспарлап отырған түлектер әңгімелесу нәтижесі бойынша қабылданады. Бұл үрдісті жоғары оқу орындарының қабылдау комиссиялары жүргізеді.
Еске сала кетейік, тамыздағы ҰБТ-ға тіркелу 25 шілде мен 5 тамыз аралығында Ұлттық тестілеу орталығының testcenter.kz сайтында өткен болатын.