Астана. 1 желтоқсан. BM.KZ – Мұндай қауіпті үйлерден тұрғындар көшіріледі.
Астанада көпқабатты тұрғын үйдің қасбетіндегі қаптама құлап, фельдшер Ұлдана Мырзуанның қазасына алып келген резонансты оқиғадан кейін, кейбір елордалық тұрғындар өз қауіпсіздігіне алаңдай бастады.
Осы ретте BM.KZ редакциясы мұндай қайғылы оқиғалардың алдын алу үшін қалалық әкімдік қандай шаралар қабылдап жатқанын анықтауды жөн көрді.
Редакцияның ресми сауалына жауап берген Астана қаласының тұрғын үй және тұрғын үй инспекциясы басқармасы елордада тұрғын үй қорын реновациялау жобасы іске асырылып жатқанын хабарлады. Жоба аясында тозығы жеткен апатты үйлер толықтай бұзылмақ. Қазіргі таңда 4 710 пәтерден тұратын 206 апатты үйдің тізімі бекітілген. Осы тізімге сәйкес тұрғындарды көшіру жоспарланып отыр.
Басқарма өкілдері үйлерді бұзу тәртібінің қалай жасалатынын да түсіндірді.
«Реновацияға жатқызылатын нысандар тізімін аудан әкімдіктері анықтайды. Ол үшін алдымен техникалық сараптама қажет үйлерге визуалды тексеру жүргізіледі. Мұндағы басты мақсат — тұрғын үй қорының құрылыс конструкцияларындағы физикалық тозу деңгейін бағалау», – делінген ресми жауапта.
Тұрғын үйлердің техникалық тексерісі жыл сайын конкурс негізінде жүргізіледі.
«Егер үйдің физикалық тозу деңгейі 61%-дан асса, оны “апатты” деп тану мәселесі қалалық әкімдік жанындағы тұрғын үй қорын реновациялау жобасын іске асыру жөніндегі комиссия отырысына шығарылады», — деп мәлімдеді басқарма.
Қараша айында Астанадағы тұрғын үй кешендерінің бірінде тағы бір қайғылы жағдай тіркелген болатын. Жөндеу жұмыстары кезінде лифт үзіліп түсіп, салдарынан лифт компаниясының бір қызметкері оқиға орнында көз жұмды.
BM.KZ редакциясының сауалына жауап Астана қаласының тұрғын үй және тұрғын үй инспекциясы басқармасы 2024–2025 жылдары лифттерге қатысты апаттық жағдайлар тіркелмегенін хабарлады. Демек, қарашадағы лифттің құлауы – соңғы екі жылдағы жалғыз оқиға. Соған қарамастан, бүгінде Астанада 218 лифт күрделі жөндеуді немесе толық ауыстыруды қажет етіп тұр.
«Аталған 218 лифт апатты деп танылған жоқ. Олар толық жабдықталмауына, зауыттар-өндірушілердің жабылуына байланысты қосалқы бөлшектердің болмауына және өзге де себептерге байланысты жөндеуді (немесе ауыстыруды) талап етеді», – делінген ақпаратта.
Басқарма 2025 жылы Астанада 1 025 лифттің пайдалануға берілгенін, сондай-ақ қалада қазір 95 лифт компаниясы жұмыс істейтінін атап өтті.
Темірлан Құспаев, Астана
BM.KZ