Астана. 11 қараша. /Диана Ыдырыс/ BM.KZ – Жоба Nvidia компаниясының инфрақұрылымы негізінде жүзеге асырылады және ұлттық жасанды интеллект жүйелерін орналастыруға арналған орталыққа айналады, деп хабарлайды Crowdfund Insider.
Қазақстанда өңір бойынша ең ірі жасанды интеллект орталықтарының бірі салынады. Freedom Holding Corp (FRHC) пен Қазақстан Республикасының Жасанды интеллект және цифрлық даму министрлігі құны 2 миллиард АҚШ долларын құрайтын «Sovereign AI Hub» жасанды интеллект орталығын салу жөнінде келісімге қол қойды.
Министрлік бұл бастаманы қолдау мақсатында ірі есептеу кешендерін орналастыру мен пайдалануға қажетті жағдайлар жасайды. Сонымен қатар, жасанды интеллект саласында кәсіби мамандар даярлауға арналған арнайы білім беру бағдарламаларын іске қосуды жоспарлап отыр.
100 мегаватт — интеллект қуатына
Орталық 100 мегаватт электр қуаты бар аумақта салынады. Бұл — ірі деректер орталықтарына тән қуат деңгейі. Freedom Holding жобаның негізгі инвесторы әрі операторы болады.
Жаңа орталық Қазақстанның деректерді өз ішінде өңдеу мүмкіндіктерін кеңейтіп, Орталық Азия елдерінен жасанды интеллектке қатысты жаңа жобалар мен есептеу жүктемелерін тартуға мүмкіндік береді.
Қазіргі уақытта жобаның нақты іске асу мерзімі, қаржыландырудың бөліну тәртібі және есептеу қуатының мемлекеттік және жеке секторлар арасындағы үлесі әлі жарияланған жоқ.
Контекст
«Тәуелсіз» жасанды интеллект орталығын құру — әлем елдерінің жеке ұлттық AI-инфрақұрылымын дамытып, деректерді ел аумағында сақтау арқылы технологиялық тәуелсіздікке ұмтылуының көрінісі.
Nvidia компаниясының жүйелері мұндай жобаларда әлемнің түкпір-түкпірінде — Еуропадан бастап Таяу Шығысқа дейін кеңінен қолданылып келеді.
Freedom Holding Corp — акциялары NASDAQ, KASE және AIX биржаларында саудаланатын халықаралық корпорация. Компания Қазақстан мен тағы 21 елде қаржылық және цифрлық қызметтердің кең экожүйесін басқарады.
Компания өкілдерінің айтуынша, жаңа жасанды интеллект орталығы Қазақстанның технологиялық тәуелсіздігін нығайтып, цифрлық экономиканың дамуына жаңа серпін береді.