Астана. 15 тамыз. BM.KZ — Биыл Қазақстанда жаңартылған «Мемлекеттік сатып алу туралы» заң қолданысқа енгізілді. Құжаттағы негізгі өзгерістерге келсек, сатып алу рәсімдерін жеңілдету, шағымдарды тікелей тендер ұйымдастырушыларына жолдау және нәтижелерді портал арқылы даулауға мүмкіндік беру болып отыр. Жаңа нормалардың басты мақсаты – сатып алу процесін оңайлату және шағымдардың санын азайту еді. Алайда статистика керісінше, 1,5 есе көбейгенін көрсетіп отыр.
Ranking.kz жазуынша, Бас прокуратураның Құқықтық статистика және арнайы есепке алу комитетінің деректеріне сәйкес, 2025 жылғы қаңтар-маусым аралығында мемлекеттік сатып алу саласындағы мемлекеттік органдардың шешімдеріне қарсы бірінші инстанция соттарына түскен әкімшілік істердің жалпы саны 1,8 мыңға жеткен. Бұл өткен жылдың сәйкес кезеңімен салыстырғанда 54%-ға көп.
Осы істердің үштен бірі (614 іс) келісімшарт жасалғанға дейінгі дауларға қатысты болып отыр. Бұл көрсеткіш бір жылда 41,5%-ға өскен. Ал тікелей келісімшарт жасау барысында туындаған даулар бойынша 261 іс қаралған. Бұл өткен жылдың алғашқы жартыжылдығымен салыстырғанда екі есеге жуық көп.
Айта кетейік, мемлекеттік сатып алуларға қатысты әкімшілік істер санының өсу үрдісі өткен жылы да байқалған. 2024 жылы қаңтар-желтоқсан айларында бірінші инстанция соттарына 2,2 мың іс түскен. Бұл 2023 жылмен салыстырғанда 27,5%-ға артық.