Астана. 29 қыркүйек. BM.KZ — Орегон билігі штаттың ең ірі қаласы Портлендке Ұлттық гвардия әскерін орналастыруға жол бермеуді талап етіп отыр, деп хабарлайды NBC News.
Талап арызда Портленд федералды сотынан Трамп әкімшілігінің Ұлттық гвардия әскерін Портлендке орналастыруын тоқтатуды және оның шешімін заңсыз деп тануды сұраған. Сотта жауапкер ретінде президент Дональд Трамп, қорғаныс министрі Пит Хегсет және ішкі қауіпсіздік министрі Кристи Ноэм аталды.
Орегон губернаторы Тина Котектің айтуынша, штатта немесе Портлендте әскерді орналастыруды талап ететін көтеріліс немесе қоғамдық қауіп жоқ.
«Президентпен сөйлескенде мен оған бұл мәселенің негізсіз екенін жеткіздім. Бірақ ол Орегон тұрғындарының қауіпсіздігі мен өзін-өзі басқару құқығын елемеді. Бұл қажетсіз және заңсыз», — деді губернатор.
Ақ үйдің баспасөз хатшысы Эбигейл Джексон болса, Трамптың шешімін заңды деп таныды. Ол: «Президент Ұлттық гвардияны Портлендте тәртіпсіздіктерге қарсы және федералды активтер мен қызметкерлерді қорғау үшін жіберді», — деді.
Портленд полициясының статистикасына сәйкес, биыл қаладағы қылмыс деңгейі өткен жылмен салыстырғанда біршама тұрақты қалыпта. Жыл басынан бері 37 893 қылмыс тіркелсе, өткен жылы бұл көрсеткіш — 37 859 болған. Кісі өлтіру саны 50%-ға азайса, ауыр шабуылдар — 4%-ға төмендеген. Ал қарапайым шабуылдар саны 8%-ға артқан.
Бұл іс Орегон мен Трамп әкімшілігі арасындағы саяси шиеленістің жаңа кезеңін ашып отыр.