Астана. 20 тамыз. BM.KZ – Ресей президенті Владимир Путин АҚШ басшысы Дональд Трамппен телефон арқылы сөйлесу барысында Украина президенті Владимир Зеленскийге Мәскеуде кездесу өткізуді ұсынған. Бұл туралы Eadaily AFP ақпарат агенттігіне сілтеме жасап хабарлады.
Алайда Мәскеу әзірге бұл ақпаратты ресми түрде растаған жоқ.
AFP мәліметінше, Зеленский Ресей астанасында екіжақты кездесу өткізу туралы ұсыныстан бас тартқан.
Бұған дейін Ақ үйде Трамп, Зеленский және еуропалық көшбасшылардың келіссөздері өткен болатын. Кездесуден кейін АҚШ президенті Владимир Путинге қоңырау шалып, Украина басшысымен үшжақты келіссөз өткізу мүмкіндігін талқылаған. АҚШ мемлекеттік хатшысы Марко Рубионың айтуынша, Путин бұл ұсынысқа келісімін берген.
Ал EADaily таратқан ақпаратқа сәйкес, Путин мен Зеленскийдің ресми кездесуі Венгрияда өтуі ықтимал. Бұл жөнінде алғашқы болып Reuters агенттігі Трамп әкімшілігіндегі жоғары лауазымды дереккөзге сілтеме жасап хабарлаған. Дегенмен Ресей билігі әзірге мұндай келіссөзге қатысты ресми мәлімдеме жасаған жоқ.