Астана. 21 тамыз. BM.KZ — Елімізде қатерлі ісікке шалдығу деректері артып отыр. Денсаулық сақтау министрлігінің мәліметінше, 2024 жылы, бұл көрсеткіш 100 мың адамға шаққанда 239,2-ні құраған. Бұл, 2023 жылғы көрсеткіштен (230) біршама жоғары.
Ең жоғары көрсеткіштер тіркелген өңірлер:
Қарағанды облысы – 353,5;
Қостанай облысы – 352,7;
ШҚО – 349,4;
Абай облысы – 302,4.
Ауылдық жерлерде жағдай салыстырмалы түрде тұрақты. Аурушаңдық 147,1-ге дейін төмендегенімен, кейбір ауылдарда көрсеткіш жоғары күйінде қалып отыр. Мәселен, ШҚО ауылдары – 355,2 болса, Ақмола облысының ауылдары 306,2-ні құрады.
2024 жылы онкологиялық есепте тұрған науқастар саны 230,9 мыңға жетіп, бір жылда 12,8 мың адамға артқан. Көш басында Алматы қаласы тұр (34,2 мың). Ал, Қарағанды облысы – 21,4 мың. Елорданың көрсеткіші 16,8 мыңды құраған.
Алматыдағы жоғары көрсеткіш қала халқының тығыздығына байланысты. Аурушаңдық деңгейі мұнда республика бойынша орташа деңгейден төмен.
Керісінше, 2024 жылы алғаш рет қатерлі ісік диагнозы қойылғандар саны 204,8-ге дейін төмендеген (2023 ж. – 208,6). Бұл, ерте диагностика деңгейінің нашарлағанын көрсетеді.
Ал, жаңа диагноз қойылғандар саны бойынша Алматыда 5,2 мың. Қарағанды облысы – 3,8 мың. Сонымен қатар, Астанада 3 мың факті анықталған.
Ең жиі кездесетін қатерлі ісік түрлеріне келер болсақ, министрліктің мәліметі бойынша, сүт безі обыры- 13,9% (98%-ы I–III сатыда анықталған). Ал, тері қатерлі ісігі – 9,6% құраған. Өкпе обыры – 9,2% (25%-ы кеш сатыда анықталған).
Қазақстан бастапқы онкологиялық аурушаңдық бойынша ТМД елдері ішінде 5-орында тұр. Ал, Орталық Азияда бірінші орынға жайғасқан.
Салыстырмалы түрде айтар болсақ, Беларусь – 646,9, Ресей – 466,2, Қырғызстан – 86, Тәжікстан – 32,1 көрсеткішті құраған.
Елімізде осы аурудан өлім-жітім де артып келеді. Нақтырақ айтар болсақ, 2024 жылы қатерлі ісіктен қайтыс болғандар көрсеткіші 100 мың адамға шаққанда 68-ге жеткен (2023 ж. – 65,1). Бұл өсім 20 өңірдің 13-інде байқалған. Оның ішінде ең жоғары өлім-жітім ШҚО-да тіркелген (117,7). Ал, Абай облысында – 117,2.