Астана. 26 қыркүйек. BM.KZ – Жақында Қазақстанда құрылған Жасанды интеллект және цифрлық даму министрлігі (ЖИЦДМ) бір апта өтпей жатып-ақ өзінің жаңа логотипін бүкіл әлемге таныстырды.
Министрлік мамандарының айтуынша, жаңа логотип Қазақстанның үздіксіз дамуға және жаңа технологияларға ұмтылысын көрсетеді. Сонымен бірге оо айқын қазақы нақышқа ие.
Логотиптегі шеңбер – шаңырақты бейнелейді. Бұл – халқымыздың мәдениеті мен бірлігінің белгісі. Сондай-ақ ол Жер планетасын еске салып, Қазақстанның ашық әрі жаһандық деңгейдегі ел екенін көрсетеді. Шеңбер ішіндегі төртбұрыштар – микрочиптер мен суперкомпьютерлерге сілтеме. Яғни, жасанды интеллект жүйесінің негізін құрайтын технологияларды білдіреді. Тор пішініндегі өрнек – цифрлық матрица. Оның әрбір ұяшықтары – мемлекеттің, бизнестің, ғылым мен қоғамның ортақ қозғалысын білдіреді. Түстер үйлесімі – дәстүр мен болашақтың байланысын көрсетеді.
Ведомствоның түсіндіруінше, жаңа логотип – жоғары технологиялар мен ұлттық құндылықтардың үйлесімі.
Еске сала кетейік, 24 қыркүйекте Мәжіліс «Жасанды интеллект туралы» заң жобасын екінші оқылымда мақұлдады. Жаңа құжатта жасанды интеллектке адамдардың эмоциясын талдауға тыйым салу қарастырылған.