Астана. 19 тамыз. / Нұргүл Ерғалиқызы/ BM.KZ — Ұлттық экономика министрлігінің Табиғи монополияларды реттеу комитеті жылу энергиясын есепке алу аспаптары жоқ тұтынушылар үшін жылумен жабдықтау қызметтерінің құнын қайта есептеу жұмыстарын аяқтады. Бұл жұмыс сыртқы ауа температурасына байланысты төлемдерді түзетуге міндеттейтін заңнамаға сәйкес жүргізілді.
Қайта есептеу нәтижесінде 1 554,7 млн теңгеден астам қаражат (ҚҚС-ты қоса алғанда) тұтынушыларға қайтарылады. Қаражат 2024–2025 жылғы жылыту маусымында немесе 2025 жылдың соңына дейін күнтізбелік жыл аясында жеке шоттарда аванс (сальдо) ретінде көрсетіледі.
Қаражатты қайтару еліміздің барлық өңірлерін қамтиды. Атап айтқанда:
Астана – 224,5 млн тг;
Алматы – 74,2 млн тг;
Қарағанды облысы – 457,0 млн тг;
Шығыс Қазақстан облысы – 257,2 млн тг;
Маңғыстау облысы – 176,7 млн тг;
Қостанай облысы – 106,9 млн тг;
Солтүстік Қазақстан облысы – 74,8 млн тг;
Ақмола облысы – 44,3 млн тг;
Павлодар облысы – 34,8 млн тг;
Қызылорда облысы – 23,9 млн тг;
Ақтөбе облысы – 24,1 млн тг;
Жамбыл облысы – 21,4 млн тг;
Абай облысы – 19,9 млн тг;
Атырау облысы – 11,0 млн тг;
Батыс Қазақстан облысы – 3,4 млн тг;
Алматы облысы – 0,5 млн тг;
Түркістан облысы – 0,1 млн тг;
Жетісу облысы – 0,03 млн тг.
Шымкент қаласы мен Ұлытау облысында қайта есептеу жүргізілмейді, себебі бұл өңірлерде жылу тарифі бастапқыда нақты ауа температурасына сәйкес қалыптастырылған.
Айта кету керек, Астанада қайта есептеу жылыту маусымы бойы ай сайын жүргізіліп отырды. Бұл тәсіл температура өзгерістерін нақты есепке алуға және тұтынған жылу көлемін дәл көрсетуге мүмкіндік берді.