Астана. 30 қараша. BM.KZ — Қазақстан Республикасы Сыртқы істер министрлігінің ресми өкілі Айбек Смадияров Каспий құбыр консорциумына жасалған шабуылға байланысты мәлімдеме жасады.
Сыртқы істер министрлігі Новороссийск теңіз порты акваториясында халықаралық Каспий құбыр консорциумының аса маңызды инфрақұрылымына бағытталған кезекті мақсатты шабуылға байланысты наразылық білдірді.
Ведомствоның хабарлауынша, бұл оқиға халықаралық құқық нормаларымен қорғалатын азаматтық нысанға қарсы жасалған үшінші агрессиялық акті болып отыр.
– Жаһандық энергетикалық нарықтың жауапты қатысушысы ретінде Қазақстан энергия ресурстарын тұрақты әрі үздіксіз жеткізуді қамтамасыз етуге ерекше мән береді. Каспий құбыр консорциумы әлемдік энергетикалық жүйенің тұрақтылығын сақтауда айрықша орын алатынын атап өтеміз. Осы оқиғаны Қазақстан Республикасы мен Украинаның екіжақты қатынастарына залал келтіретін әрекет ретінде бағалаймыз және украин тарапы мұндай жағдайлардың қайталануына жол бермеу бойынша нақты шаралар қабылдайтынын күтеміз, – делінген хабарламада.
Айта кетейік, 29 қараша күні сағат 06:06-де Новороссийск маңындағы Каспий құбыр желісі консорциумының теңіз терминалы шабуылға ұшырады. Су үстіндегі ұшқышсыз қайықтар акваторияға шабуыл жасап, ВПУ-2 ауыспалы айлақ құрылғысын зақымдады. Консорциум бұл оқиғаны әдейі жасалған террористік шабуыл деп атады. Порт капитанының бұйрығымен барлық тиеу жұмысы дереу тоқтатылып, танкерлер акваториядан шығарылды. Консорциум қызметкерлері мен мердігерлер арасында зардап шеккендер жоқ.
Жарылыс кезінде авариялық қорғаныс жүйесі тиісті құбырларды автоматты түрде жапқан. Алдын ала мәлімет бойынша, Қара теңізге мұнай төгілмеген. Қазір мамандар су сынамаларын алып, экологиялық мониторинг жүргізіп жатыр және төтенше жағдай туындаған жағдайда оны жою жоспары бойынша әрекет етеді.
КҚК өкілдері зақымданған ВПУ-2 құрылғысын пайдалануға болмайтынын мәлімдеді. Теңіз дрондарынан төнген қауіп жойылғаннан кейін ғана мұнай тиеу қайта басталады.
Бұл — осымен үшінші ұқсас оқиға. Бұған дейін «Кропоткинская» мұнай айдау станциясы мен Новороссийск маңындағы терминал офисі шабуылға ұшыраған еді.