Астана. 26 тамыз. BM.KZ — Премьер-министр Олжас Бектеновтің төрағалығымен өткен Үкімет отырысында өңірлердегі жылыту маусымына дайындық барысына көңіл бөлінді. Оның айтуынша, кейбір облыста қысқа дайындық бойынша өңірлік штабтардың жұмыстары мардымсыз болып отыр.
Үкімет басшысының сөзінше, Риддер, Кентау, Екібастұз және Ақтау қалаларының энергия көздерін ерекше бақылауға алу қажет. Оның тапсырмасы бойынша, Энергетика министрлігі Қазақстан теміржолы компаниясымен және өңірлердің әкімдіктерімен бірге энергия объектілеріне көмір мен мазутты бекітілген кесте мен көлемдерге сәйкес уақтылы жеткізу жөнінде, сондай-ақ халықтың көмірмен қамтамасыз етілуіне бақылау жүргізу жөнінде шаралар қабылдауы қажет.
Энергетика министрі Ерлан Ақкенженовтің айтуынша, көмір өндіруші кәсіпорындар осы жылдың 7 айында 61,4 млн тонна көмір өндірді, оның ішінде коммуналдық-тұрмыстық қажеттіліктерге және халыққа 2,2 млн тонна, энергетикалық кешендерге 37,4 млн тонна, өнеркәсіптік кәсіпорындарға 1,6 млн тонна, экспортқа 18,2 млн тонна жөнелтілді.
Алдағы жылыту маусымына көмір өнімдеріне қажеттілік шамамен 7,7 млн тоннаны құрайды. Бүгінгі таңда шамамен 2,2 млн тонна жеткізілді, бұл жылдық жоспардың 29%-ы. Әкімдіктердің мәліметінше, оны өткізу орындарындағы көмірдің жалпы қоры 434 мың тоннаны құрайды.