Мәжілісте Конституцияның 30 жылдығына орай кейбір сотталғандарға рақымшылық жасауға бағытталған заң жобасы талқыланып жатыр. Бұл бастама қоғам мен депутаттар арасында қызу пікірталас тудырды. Талқылау кезінде Мәжіліс депутаты Ермұрат Бапи сыбайлас жемқорлық үшін сотталғандардың босап кету қаупіне алаңдаушылық білдірді.
– Бізде сыбайлас жемқорлық – жүйелі дерт. Оның үлкен-кішісі болмайды. Аздап жемқорлық, толық жемқорлық деген болмайды. Ондай әрекеттерді қалайша жеңіл немесе ауыр қылмыс деп бөлуге болады? – деді депутат.
Алайда депутат Абзал Құспан бұл мәселеге нақты жауап берді. Оның айтуынша, заң жобасының төртінші бабында рақымшылық қолданылмайтын жағдайлар нақты көрсетілген.
– Сыбайлас жемқорлық сипатындағы барлық қылмыстар рақымшылықтан тыс қалды. Қазіргі таңда 624 адам осы қылмыстары үшін бас бостандығынан айырылған. Олардың ешқайсысы бұл заң аясында бостандыққа шықпайды, – деп нақтылады ол.
Заң жобасының екінші бабында, егер адам қылмысы арқылы өзгеге зиян келтірмесе немесе келтірген зиянды толық өтесе, орташа ауырлықтағы қылмыстар бойынша рақымшылық қолданылатыны жазылған. Сонымен қатар, ауыр және аса ауыр қылмыстар бойынша жаза мерзімдерін қысқарту да қарастырылып отыр.
Айта кетейік, Конституцияның 30 жылдығына арналған рақымшылық аясында 4 100 адам бостандыққа шығуы мүмкін.