Астана. 24 шілде. BM.KZ – Мемлекет басшысы Қасым-Жомарт Тоқаев Амур облысында жолаушылар ұшағының апатқа ұшырауына байланысты Ресей Президенті Владимир Путинге көңіл айтты, деп хабарлайды Ақорда.
Бұған дейін Ан-24 әуе кемесі Тында қаласының маңында құлағаны жөніндегі ақпарат шықты. Бұл туралы шұғыл қызметтерге сілтеп «Интерфакс» агенттігі хабарлады.
«Тында қаласынан 15 шақырым жерде тау бөктерінен Ан-24 ұшағының сынықтары табылды. Ұшақ толық қираған», — деді шұғыл қызмет өкілдері хабарламасында.
«Ангара» әуе компаниясына тиесілі Ан-24 ұшағы бейсенбі күні Хабаровск қаласынан жергілікті уақыт бойынша 07:36-да (Мәскеу уақытымен 00:36) кесте бойынша ұшып шыққан. Бұл туралы «Интерфакс» агенттігіне Хабаровск әуежайының баспасөз қызметі хабарлады. Ұшақ Хабаровск – Благовещенск – Тында бағытымен ұшқан. Алайда Тында әуежайына жақындаған тұста әуе көлігі радардан жоғалып, диспетчерлермен байланыс үзілген.
Шұғыл қызметтердің мәліметінше, ұшақ бортында 46 адам болған болуы мүмкін, оның ішінде 40 жолаушы. Қайғылы оқиға бойынша Ресей Қылмыстық кодексінің 263-бабы 3-бөлігіне сәйкес («Әуе көлігі қозғалысы мен пайдалануының қауіпсіздік ережелерін бұзу, бірнеше адамның қаза болуына әкеп соғу») қылмыстық іс қозғалды. Бұл туралы РФТК көлік саласы бойынша Шығыс аймақаралық тергеу басқармасы мәлімдеді.