Сауда министрлігінің өкілі қауіпсіздік ережелеріне сәйкес келмейтін көлік құралдарын елге әкелуге жол бермеу шаралары туралы баяндады
ҚР СИМ Техникалық реттеу және метрология комитетінің төрағасы Қуаныш Елікбаевтың айтуынша, бүгінде қолданыстағы 71 аккредиттелген зертхананың 55-інде көлік құралы конструкциясының қауіпсіздігі туралы куәлік рәсімделеді. 2023 жылдың қорытындысына сәйкес, мемлекеттік бақылау нәтижелері бойынша 1300 куәліктің күші жойылды, зертханаларды аккредиттеудің 4 аттестаты кері қайтарылды.
«Техникалық регламенттердің талаптарына сәйкес келмейтін көлікті әкелуге жол бермеу мақсатында жедел шаралар шеңберінде Мемлекеттік кірістер комитеті мен Техникалық реттеу және метрология комитеті арасында өзара іс-қимыл туралы бірлескен бұйрыққа қол қойылды. Оған сәйкес ішкі тұтынудың кедендік рәсіміне орналастырылатын жүк көлік құралдары бірлескен тексеруге жатады. Бұл, ең алдымен, экологиялық санаты Еуро-5 деп Еуро-2 санатына жататын жүк көліктерін әкелуге байланысты. Тексеру актілерінде көлік құралының экологиялық санатының сәйкестігі не сәйкес еместігі туралы тиісті жазба енгізілетін болады. Тексеру нәтижелеріне байланысты көлік құралын ел аумағына әкелуге тыйым салу туралы шешім қабылданады», — деді спикер ОКҚ алаңында өткен баспасөз конференциясында.