Астана. 23 қазан. BM.KZ – Күрес түрлерінен Сербияның Нови-Сад қаласында өтіп жатқан 23 жасқа дейінгі жастар арасында жаһандық додада ел қоржынына екі жүлде түсті.
Грек-рим күресінен 97 келідегі Иусуф Мациев финалдық бәсекеде Украина спортшысы Егор Якушенкоға 1:6 есебімен есе жіберді.
— Отандасымыз әлем чемпионатында Кио Китавакиді (Жапония) 2:1, Аршак Гегамианды (Армения) 4:0, Максим Аверинді (бейтарап спортшы) 9:1 есебімен ұтты, — делінген Спорт комитетінің жазбасында.
Иусуф Мациев бұған дейін — 2022 жылы Болгария төрінде 20 жасқа дейінгі жастар арасында әлем чемпионатында да күміс медаль иеленген еді.
Ал ұлттық құрама қоржынына алғашқы медальді Мерей Мәулетханов салды.
— Қазақстандық балуан 72 келіге дейінгі салмақ дәрежесінде қола жүлдеге ие болды. Қола үшін өткен белдесуде отандасымыз ресейлік Данил Григорьевті айқын басымдықпен жеңді, — деп хабарлады Ұлттық Олимпиада комитетінің баспасөз қызметі.