Шымкент қаласының тұрғыны Филипп Герасимов өзінің үшжылдық еңбегінің жемісін алғаш рет көпшілікке таныстырды. Өнертапқыш қолдан жинаған коптерін Тәуелсіздік саябағының автотұрағына көлігімен жеткізіп, арнайы демонстрация өткізді. Оның айтуынша, бұл құрылғы жай әуеге көтерілетін құрал емес, болашақтың көлігі.
Филипптің айтуынша, коптерді жинау оңай болмаған. Салмағы 50 келіге жуықтайтын бұл «темір құстың» қалақтары ұшар алдында қолмен ашылады. Жобаны құрастыру барысында түрлі сәтсіздіктер мен техникалық қиындықтар кездескен. Бірнеше рет құлаған, дұрыс емес шешімдер қабылданған сәттер де болған. Алайда шебер, бастаған ісін соңына дейін жеткізуді мақсат етіп, қателіктермен жұмыс істеуді жалғастырған.
«Бұл, раманың екінші нұсқасы. Бұған дейін мүлде басқа формада болған. Жалпы алғанда, жобаны іске асыруға үш жыл уақыт кетті», – дейді өнертапқыш.
Коптердің барлық бөлшегі өз қолымен жасалған. Негізгі құрылым темір рама, оны да өзі жобалап, жинап шыққан. Ең қызығы, бұл рама кез келген формада бола алады, себебі құрылғының барлық компоненті басқа рамаға оңай ауыстырылады. Өнертапқыштың айтуынша, бұл коптер 120 келіге дейінгі адамды көтере алады. Ұшу принципі қарапайым, неғұрлым жеңіл болсаң, соғұрлым ұзақ әуеде боласың. Бірақ бұл да өзгертілетін дүние. Сапалы бөлшектер қойылса, құрылғының көтергіштігі мен тұрақтылығы арта түседі.
Айта кету керек, бұған дейінгі барлық сынақ қала сыртындағы ашық алаңдарда жүргізілген. Сол жерде коптердің қуаты мен мүмкіндіктері толықтай сыналған.
«Бұл жобаны түрлі салада қолдануға болады. Мәселен, өрт сөндіру, құтқару, жедел медициналық тасымал секілді. Қазіргі рама адамның отыруына арналған, бірақ болашақта кез келген формаға өзгертуге болады. Бұл басқаруға әсер етпейді», – дейді өнертапқыш.
Филипп Герасимов, кәсіби білімі жоқ, өздігінен үйренген өнертапқыш. Қазір ол жұмыс пен қатар жаңа жобаларды қарастырып жүр. Айтуынша, дәл осындай коптерді Орталық Азияда қолдан жасай алған ешкім жоқ. Оның арманы, осы жобаны елге пайдалы деңгейге жеткізу. Тіпті, салыстырмалы түрде алғанда, өнертапқыш шетелдік өндірушілердің осындай коптерлерінің құны 30 миллион теңгеге дейін жететінін айтады. Ал, ол өз жобасын әлдеқайда қолжетімді әрі жергілікті өндіріс ретінде ұсынуды көздеп отыр.
«Алда әлі де атқарылар жұмыс көп. Дегенмен, сенімім мол. Осы жасаған, ұшатын құрылғы елімізде түрлі салаларда кеңінен қолданысқа еніп, үлкен сұранысқа ие болады деп сенемін», – деді ол.
Нұргүл Ерғалиқызы,
Шымкент, BM.KZ