Созбаққа салынған заң жобасы немесе отандық бизнесті кім қорғайды?
Соңғы жылдары Қазақстанда белгілі топтың отандық такси компанияларын емес халықаралық Яндекс пен InDrive қызмет көрсету желілерін қолдап отырғаны туралы алып қашпа әңгімелер көбейді. Қарапайым азаматтар отандық компанияға емес шетелдік компанияға қолдау көрсетуге тырысатын депутаттарымызды түсіндей дал болуда. Отандық өнімді қолдау керектігін Мемлекет басшысы да, жаңа тағайындалған Үкіметбасы да шегелеп тұрып айтқан еді. Иа, расында шетелдік Яндекс такси заманауи құрылғыларды пайдалана отырып қызмет көрсететіндіктен ыңғайлы көрінетіні хақ. Сондықтан да қала тұрғындарының осы компанияның қызметіне жиірек жүгінетіні белгілі. Бірақ заңдық нормалары ретттелмеген, тапсырыс берушіге деген жауапкершілікті сезінбеген такси компаниясының жүргізушілері жол қауіпсіздігін сақтамай, адам өміріне қауіп төндіріп жатқанын да білеміз. Мысалға, шетелдік адам тасымалы компанияларында істейтін жүргізушілердің нақты жұмыс уақыты белгіленбеген. Ақша табу үшін жан аямай шапқылайтын жүргізушілер тіпті түнімен ұйықтамай жұмыс жасауға мәжбүр. Олардың жұмыс уақытын реттейтін заңнама көршілес Ресейде қабылданып қойған. Нәтижесінде өткен жылдың өзінде 24 жол көлік оқиғасынан адамдар қаза тапты. Бұл факт! Дегенмен тұрғындардың басым көпшілігі қолданатын шетелдік компанияларға кетіп жатқан қаражат отандық бизнестің дамуына жұмсалса сапасы да өзгерері сөзсіз.
Нәтижесінде отандық адам тасымалымен айналысатын компаниялардың қаражат жетіспеушілігі салдарынан қызметкерлеріне жоғары деңгейдегі жалақы төлеуі мүмкін болмай отыр. Сондықтан отандық және шетелдік компаниялар өзара келісімге келіп, ортақ мүдде үшін жұмыла жұмыс істейтін, мемлекеттік органдар мен құзырлы мекемелер бақылауға алатын сәт туған сияқты. Ал «халық қалауымен» сайланған депутат мырзалар шетелдік компаниялардың мүддесін емес, отандық бизнестің дамуын бірінші кезекте қолдаса құба-құп болар еді. Жақында Мәжіліске отандық адам тасымалымен айналысатын компанияларды қолдауға арналған заң жобасы енгізілді. Ұзаққа созылып кеткен заң жобасынның тезірек қабылдануын халық қаласа да, «халық қалаулылары» ұзаққа созып, шетелдік компанияның мүддесін қорғап, мәселе «сиырқұйымшықтанып» бара жатқанын көріп отырмыз. Заң жобасының қабылданбай отырғанына алаңдаған отандық адам тасымалы саласының бір топ мамандары біздің «Baimedia.kz» редакциясына көмек сұрап келді. Қоғам тарапынан туындаған маңызды мәселелерге қашан да назар аударып, билік өкілдерінен тиісті жауап алуды мақсат еткен редакция ұжымы бұл мәселені бақылауда ұстайтын болады.
https://www.instagram.com/reel/C4sjF6FoVwD/?igsh=d3g3ZjVpNXZreG5p
Baimedia.kz