Астана. 22 желтоқсан. BM.KZ — Арал қаласынан 120 шақырым жерде, яғни ең шалғай орналасқан Ақбасты ауылына да су жеткізілген. Бұл туралы облыс әкімі Нұрлыбек Нәлібаев Орталық коммуникациялар қызметінің брифингінде айтты.
Әкімнің айтуынша, биыл 41 елді мекенде 66 жобаны іске асыруға 15 млрд 155 млн теңге бөлінген. Президент тапсырмасына сәйкес, биыл барлық елді мекен 100 пайыз орталықтандырылған сапалы ауыз сумен қамтылды.
— Мемлекет басшысы 2023 жылы өңірге жұмыс сапары кезінде Қызылорда қаласын ыстық сумен қамту туралы тапсырма берген болатын. Осылайша қызылордалықтардың арманына айналған көпқабатты тұрғын үйлерге ыстық су қосу мәселесі оң шешімін тапты. Осы мақсатқа 26 млрд 200 млн теңге бөлініп, 423 тұрғын үйге жоба әзірленді. Жобалар 2 кезеңмен іске асырылуда, – деді Н.Нәлібаев.
Әкімнің айтуынша, қазір 6 млрд 400 млн теңге болатын 9 жоба іске қосылды.
— Соңғы жылдары болған су тапшылығы әсерін Сыр диқандары да сезініп отыр. Президент тапсырмасына сәйкес, өңірде Премьер-министр бастаған Үкімет делегациясы арнайы келіп, шаруалардың жағдайымен, егістің жай-күйімен танысты. Нәтижесінде Төтенше жағдайлар министрлігінен 139 қызметкерден құралған жеке құрам көмекке жеткізіліп, 2 ай бойы шаруаларымыздың игілігі үшін үлкен жұмыс істеді, — деді Н. Нәлібаев елордада Орталық коммуникациялар қызметінде.
Мемлекет басшысының тапсырмасымен Үкімет резервінен Қызылорда облысына 53 насос қондырғысын алу үшін 1 млрд теңге қаржы бөлінген. Дер кезінде қабылданған шешімдердің негізінде егіс алқаптары толығымен сумен қамтылған.
Енді су ресурстарын барынша тиімді пайдалану, су үнемдеу технологияларын енгізу, су жүйелерін цифрландыру жұмыстары қолға алынған.
— Биыл диқандарымыз күріш егістіктерінің 60 мың гектарын лазерлік тегістеуден өткізіп, өнімділікті 30 пайызға арттырды. Президент тапсырмасымен өңіріміздің егін шаруашылығын әртараптандырып, су үнемдеу технологиясын кеңінен енгізуге бағытталған мемлекеттік қолдау шараларына алдағы 3 жылға 34 млрд теңгеден астам қаржы бөлінді. Келесі жылға 10 млрд теңге қарастырылды. Биыл су үнемдеу технологияларын пайдалану көлемі 8 мың 100 гектарға жеткізіліп, өткен жылмен салыстырғанда 2 есеге артты, — деді Н. Нәлібаев.
Облыстың 3 ауданында (Шиелі, Қазалы, Арал) шетелдік компаниялардың қатысуымен су үнемдеу технологияларын қолдану арқылы жүгері, жоңышқа дақылдарын егу бойынша 3 ірі жоба жүзеге асып келеді.
— Өңірімізде биыл 189 мың 600 гектарға егін егілді. Оның ішінде 80 мың 900 гектарға күріш дақылы егілді. Бүгінде әр гектардан 58,1 центнерден өнім алынып, 470 мың тоннаға жуық астық жиналды, — деді облыс әкімі.