Астана. 1 қазан. BM.KZ – Алматы тауларында Шымбұлақ шыңының баурайында түнде адасып кеткен Франция азаматы құтқарылды.
Төтенше жағдайлар министрлігінің хабарлауынша, шетелдік турист рельефтің ерекшеліктерін ескермей, тауға жалғыз көтерілген. Біраз уақыттан соң жолын жоғалтып, бағыт-бағдар таба алмай қалған.
Оның геолокациясын алған «Шымбұлақ» тау курортының қызметкерлері құтқару қызметіне хабарлаған. Іздеуге «Тұйық-су» бақылау-құтқару пунктінен арнайы экипаж шыққан.
Құтқарушылар туристі табу үшін түнде, жаңбыр астында, тайғақ әрі тар тау жолымен жүріп өтті. Альпинистік жабдықты пайдаланып, француз азаматын тау баурайынан көтеріп, қауіпсіз жерге эвакуациялады.
ТЖМ қазақстандықтар мен қала қонақтарына тауға әсіресе қараңғы уақытта жалғыз шықпауға кеңес береді.