Астана. 5 тамыз. /Әсел Мәдәліқызы/ BM.KZ – Президент Қасым-Жомарт Тоқаев Теңізге шығар жолы жоқ дамушы елдерге арналған БҰҰ-ның үшінші конференциясында сөз сөйледі.
Онда Қазақстанның өңірлік байланыс, көлік инфрақұрылымы мен цифрлық трансформация бағытындағы бастамаларын таныстырды, деп хабарлайды Ақорда.
Мемлекет басшысы еліміздің Орта дәліз және «Солтүстік – Оңтүстік» бағыттары арқылы транзиттік әлеуетін арттыруға басымдық беріп отырғанын атап өтті. Бүгінде Азия мен Еуропа арасындағы құрлықтағы жүктің 85%-ы Қазақстан арқылы өтеді.
«Түпкі мақсатымыз – темір жолдың, автокөлік жолдарының, сондай-ақ авиация мен логистика орталықтарының біртұтас желісін құру. Бұл Қазақстанның Еуразиялық транзит хабы ретіндегі позициясын нығайтады», – деді Президент.
Президент Астанадағы AlemAI жасанды интеллект орталығына қатысты ғылыми және цифрлық салада халықаралық серіктестікке ашық екенін жеткізді.
Өңірлік даму мәселесінде Қасым-Жомарт Тоқаев Орталық Азия теңізге тікелей шыға алмаса да, өзара тиімді ықпалдастық арқылы өсімге қол жеткізіп отырғанын айтты.
«Қазір теңізге шығар жолымыз болмағанымен, келешекте амалын табамыз. Яғни құрлық арқылы байланыс орнатудың маңызы арта түседі. Біздің өңірдің әлеуметтік-экономикалық дамуы орнықты. Саяси ерік-жігер, стратегиялық инвестиция мен халықаралық серіктестік болса, теңізге шығатын жолдың жоқтығы кедергі емес, керісінше, өсімге ынталандырады», – деді ол.
Сонымен қатар, президент Қазақстан мен БҰҰ арасында Орталық Азия мен Ауғанстанға арналған орнықты даму мақсаттары жөніндегі өңірлік орталық ашу жөнінде келісімге қол қойылғанын хабарлады.
Сөз соңында мемлекет басшысы Қазақстанның теңізге шығатын жолы жоқ дамушы елдер тобының мақсаттарына берік екенін мәлімдеді.