Астана. 31 қазан. BM.KZ — Түркістан облысында дене шынықтыру сабағынан кейін оқушы көз жұмды. Қайғылы жағдай, Шардара ауданындағы оқу орындарының бірінде орын алды.
Бала сабақ үстінде құлап, жарақат алған. 11 жастағы жасөспірімге білім ұясында алғашқы медициналық көмек көрсетілгенімен, ауруханада ота жасау барысында жан тапсырған.
«Бұл оқиғаны облыстық білім басқармасы бірден бақылауға алды. Алдын ала мәліметке сәйкес, дене шынықтыру сабағында оқушы жаттығу барысында құлап, жарақат алған. Мұғалім мен мектептің медициналық қызметкері алғашқы көмек көрсетіп, оқушыны Шардара аудандық ауруханаға жедел жеткізген. Өкінішке қарай, ота кезінде бала көз жұмды», – деп жазылған Түркістан облыстық білім басқармасының мәлімдемесінде.
Қазіргі таңда оқушының өліміне қатысты полиция тарапынан қылмыстық іс қозғалып, сотқа дейінгі тергеу амалдары жүргізілуде. Оқиғаның барлық мән-жайы анықталуда.
«Полиция Шардара ауданындағы оқу орындарының бірінде оқушының қаза болу фактісі бойынша қылмыстық іс қозғады. Қазіргі уақытта полицейлер оқиғаның барлық мән-жайларын анықтауға бағытталған сотқа дейінгі тергеу мен қажетті шараларды атқаруда. Тергеу нәтижелері бойынша құқықтық баға беріліп, қолданыстағы заңнамаға сәйкес шешім қабылданатын болады», – деп хабарлады Түркістан облысы ПД баспасөз қызметі.
Айта кету керек, әлеуметтік желіде баланың сабақ барысында мектеп стадионының қоршауына шығып, абайсызда сырғанап құлағаны жазылған. Салдарынан, ауыр жарақат алған.