Қарағанды облысындағы Топар ауылында тұрғындар жергілікті ЖЭС-тен шығатын күл үйіндісіне шағымданды. Айтуларынша ауа райы нашарлап жел соққан кезде бұл күл шаң болып бүкіл ауылға тарайды екен. Радиактивті қалдықтан демала алмайсың деген тұрғындар күлді жинап, мәселені шешуді талап етті. Бұл туралы Stan.kz ақпарат агенттігі КТК арнасына сілтеме жасап хабарлайды.
Тұрғындардың айтуынша, жүздеген гектар күл бүкіл ауылға тараған. Адамдар тіпті респиратор сатып ала бастаған. Ауыл тұрғындары қазір ауа райы болжамын мұқият қадағалайды. Кішкене жел соқса барлық терезе-есікті жауып, дауыл аяқталғанша ғимарат ішінде күтуге мәжбүр.
“Жасөспірім балаларым осында серуендейді. Олар үшін қатты уайымдаймын. Соңғы рет қатты дауыл кезінде қоңырау шалып, дүкен ішіне кіріп, күте тұруларын сұрадым. Өйткені сыртта тыныс алу мүмкін емес. Күйеуім тіпті респиратор сатып алғысы келді. Себебі бұл шаң ғана емес. Мұның бәрі өкпеге түседі. Үй ішін кір, шаң, күл қалдықтары алып кетеді. Өте қорқынышты!” – деді тұрғын Светлана Савинкова.
ЖЭС-ке тиесілі гектарға созылған күл үйіндісі ауылға жақын жерде орналасқан. Бұрын бұл жерлерге су құйылып отырған. Алайда соңғы кезде күлді сумен басу да тоқтатылған екен.
“Бізді енді қанша улайды? Шамамен үш жыл шығар. Осы үш жыл ішінде рекультивациялық жұмыстардың алаңдардағы күлді сумен басуды сұраймыз. Күл ауылға келмеуі керек. Шаң ғана емес, бізді күлден құралған бұлт басты. Бұл өте қорқынышты. Күл радиоактивті, сондықтан бәріміз алаңдаймыз. Көшеде жүру мүмкін емес”, – деді тұрғын Людмила Клочкова.
Кәсіпорын күлге соңғы кездері су құю тоқтағанын растады. Алайда бұл үлкен құрылыс үшін маңызды екен. Егер күлді сумен толтырса, техника жұмыс істемей қалады екен. Мекеме жұмысты тоқтата алмайтынын және барлығы жыл соңына дейін аяқталатынын жеткізді.
“Болашақта күл үйіндісінің тозаңдануын болдырмау үшін рекультивация жүргізіледі. Қазір құрылыс техникасы аймақтардан, жағажайлардан өтуі үшін құрғату шаралары қабылданды. Рекультивация бүкіл аумаққа құнарлы қабат салуды қамтиды. Яғни 187 гектарға жасалып, кейін өсімдіктер отырғызылады”, – деді «ГРЭС Топар» ЖШС өндіріс жөніндегі бас инженерінің орынбасары Андрей Соловьев.
Экология департаменті шағымдардан кейін кәсіпорынды жоспардан тыс тексермек.