Астана. 13 тамыз. BM.KZ – Үкіметі Каспий теңізі проблемаларын кешенді зерттеу жөніндегі мемлекет басшысының тапсырмаларын орындау мақсатында «Қазақ Каспий теңізі ғылыми-зерттеу институты» КеАҚ-қа 305 млн теңге бөлді.
Премьер-министр Олжас Бектенов қол қойған қаулыға сәйкес, қаражат институттың материалдық-техникалық базасын нығайтуға, гидробиология, гидрохимия, гидрометеорология және спутниктік мониторинг зертханаларында ғылыми-зерттеу жұмыстарын тиімді жүргізуге, сондай-ақ, оған жүктелген өзге де міндеттерді орындауға бағытталады.
Мемлекет басшысы Қасым-Жомарт Тоқаевтың тапсырмасымен құрылған институт Каспий теңізінің экологиялық жағдайын кешенді зерттеп, балық қорының көлемін бағалау және сақтау әдістерін әзірлеу, ихтиофаунаны зерттеу, итбалықтардың жаппай қырылу себептерін анықтау және олардың популяциясын сақтау, теңіздің гидрологиялық үдерістерін бақылау, климаттың өзгеруін және оның экожүйеге әсерін талдау, сондай-ақ, судың сапасы мен биологиялық алуантүрлілік бойынша деректер жинау сияқты маңызды жұмыстармен айналысады.
ҒЗИ-дің басқарма төрағасының міндетін атқарушы Қуаныш Берішбаевтың сөзінше, институттың қызмет саласына теңіздің гидрологиялық үдерістерін зерделеу және оның деңгейін бақылау, климаттық өзгерістерді талдау және олардың экожүйеге әсері, судың сапасы, биологиялық әртүрлілігі және Каспий теңізінің қазақстандық бөлігі мен жағалауының басқа да параметрлері туралы деректерді жинау және талдау мәселелері кіреді.
«Үкімет резервінен бөлінген қаражат гидробиология және гидрохимия, гидрометеорология, спутниктік мониторинг зертханаларында зерттеу жұмыстарын жалғастыруға және ҒЗИ алдына қойылған басқа да міндеттерді орындауға мүмкіндік береді», – дейді ол.
Айта кетейік, Каспий теңізі бірегей экожүйе әрі су биоресурстарының аса маңызды көзі, ал Қазақстанның Каспий жағалауының ұзындығы 2320 шақырымға жетіп, бұл көрсеткіш барлық Каспий маңы мемлекеттері арасында ең ұзын жағалау сызығы болып саналады.